Kommune
Kujalleq isumaginninnermut tunngasunik suliaqarnermini ikiortissarsiorluni
Naalakkersuisunut saaffiginnissuteqarsimasoq novembarip aallartinnerani
paasinarsivoq.
Kommune naapertorlugu Danmarkimit siunnersortissarsiornermut
aningaasarpassuit atorneqarsimapput.
Kommune
Kujalleq isumaginninnermut tunngasunik suliaqarnermini ikiortissarsiorluni
Naalakkersuisunut saaffiginnissuteqarsimasoq novembarip aallartinnerani
paasinarsivoq.
Kommune naapertorlugu Danmarkimit siunnersortissarsiornermut
aningaasarpassuit atorneqarsimapput.
Kommuni
ukiuni marlussunni meeqqanut, inuusuttuaqqanut innarluutilinnullu tunngasunik
siunnersortinik avataaniittunik sullissisoqartariaqarsimasoq Borgmester Stine
Egede tusagassiuutinut nalunaarummi oqarpoq.
“Taakku suliaqarsimaqaat namminerlu sulisutsinnut oqilisaassisimaqalutik,
aningaasaqarnittali sinnersortinik atuisinnaassuserput killilerpaa taakku
kommunimut akisoqimmata.”
Danmarkimi paarlatsinik ingerlatsivik
Siunnersortinik avataaneersunik atuinermi suliffeqarfik aalajangersimasoq
atorneqartoq allagaatinik takunnissinnaatitaaneq atorlugu Sermitsiap
pissarsiarisimasaata takutippaa – Danmarkimi paarlatsinik Nørresundbymiittoq “Kommune
Konsulenterne“-mik taaguutilimmit.
Suliffeqarfik 2021-miit 2025-mut Kommune
Kujallermit 27 millionit koruuninik aningaasartuutigineqarpoq. 2023-mi kommunip
suliffeqarfimmut aningaasartuutai annerpaapput, tassani 14 millionit
koruuningajaat taartaasunut aningaasartuutigineqarput.
Allagaatinik takunnissinnaanermit pissarsiat naapertorlugit
siunnersortitut suliffeqarfiit allat aamma atorneqarsimasinnaapput,
taamaalilluni aningaasat 27 millionit koruuninit amerlanerusimasinnaallutik.
2025-imi aningaasartuutit
2025-mi qaammatip aappaa avillugu qaangiuttoq 108.000
koruuningajaat ”Kommuninut Konsulenterne“-nut atorneqarsimapput, tassa suli
taakku Kommune Kujallermit atorneqarput.
Tamatuma saniatigut Isumaginninnermut
Aqutsisoqarfimmi sulisut Kommune Kujallermi aamma ikiuupput, tassanimi
isumaginninnermut suliassaqarfik novembarip qiteqqunnerani Naalakkersuisunit
tiguneqarpoq.
”Ulluinnarni ingerlatsinerup sulianillu
suliarinnittarnerup isumagineqartarnerisa saniatigut, suliassaqarfinni
eqqugaanerpaasuni Namminersorlutik Oqartussat sulisussanik isumalluutitigut
ikiuuffiginiagaanni, pitsaaliuilluni suliniuteqarnerup pitsaanerulersinnissaanut
qitiutitsinerput aamma attatiinnarniarparput. Akisussaaffik naggaterpiaatigut
kommunimut peqqittussaavoq taamaammallu aalajangernermi isumaginninnermut
ingerlatsivimmi sulisuni aqutsisunilu piginnaasanik ineriartortitsinissarput
aamma qitiutipparput”, Meeqqanut, Inuusuttunut,
Ilinniartitaanermut, Kultureqarnermut, Timersornermut Ilageeqarnermullu
Naalakkersuisoq Aqqaluaq B. Egede novembarimi oqarpoq.
Akuutinneqarneq nassuiaanneqarnerlu amigaatigineqartut
Demokraatit sinnerlugit Kujallermi
kommunalbestyrelsimut ilaasortat Margrethe Thårup Andersen, Simon Simonsen
aamma Karen Marie Kyed Frederiksen kommunimi atuivallaarneq arlaleriarlutik
isornartorsiorsimavaat, aningaasaqarnikkullu unammilligassani
akuutinneqarnerunissaq ujartorsimallugu.
Suliffeqarfimmut ”Kommune Konsulenterne”-mut
aningaasartuutit aamma 2025-mi aningaasartuutit 108.000 koruuningajaat
Margrethe Thårup Andersenip ima oqaatigai:
– Arlaleriarluta susoqarnersoq ullumikkullu qanoq inissisimasoqarnersoq
apeqqutigisarnikuuarput. Aningaasaqarneq qanoq innersoq paaserusuppara. Aamma
ukioq manna suut sipaarniutigineqassanersut apeqqutiginikuuara.
Assersuutigalugu utoqqaat angerlarsimaffimminni isumaginikinnerulertariaqarpat?
Akissutisineq ajorpugut ataatsimiinnerillu
kinguartinneqartuaannarlutik, Margrethe Thårup Andersen oqarpoq.
