Siunnersuisarfik Nuummi allaffittaartoq
Siunnersuisarfik COWI Nuummi allaffimmik oktobarip aallaqqaataani ammaavoq. Suliffeqarfik taamaalilluni Kalaallit Nunaanni suliaqarnerulersinnaanngorpoq.
COWI-p Nuummi allaffittaarnerani Lasse B. Mousten, Kalaallit Nunaanni immikkoortortaqarfimmi, pisortatut atorfinippoq.
Assi: COWI
Suliffeqarfik COWI Kalaallit Nunaanni ukiuni 60-it ingerlaneranni suliaqartarpoq, maannalu illoqarfiit pingaarnersaanni allaffimmik ammaavoq. Siunnersuisarfik tusagassiutitigut nalunaarummi allappoq.
- Kalaallit Nunaanni arlalinnik pingaarutilinnik suliaqareerpugut, ilaatigut illersornissamut tunngasunik, attaveqaasersuutit mianernartut aamma aatsitassat pingaarutillit piiarneqarnissaat eqqarsaatigalugit, aammalu Kalaallit Nunaanni illersornissakkut aningaasalersuinissanik annertuumik pisariaqartitsisoqarnera, annertusaasoqartariaqarnera ineriartortitsisoqartariaqarneralu ukiuni aggersuni annertusiartuinnartussaavoq, pisortaaneq Jens Højgaard Christoffersen oqarpoq.
Allaffiup ammarneqarneranut atatillugu Lasse B. Mousten ukiuni 18-ini kingullerni Kalaallit Nunaanni najugaqartoq immikkoortortaqarfimmi pisortanngorpoq:
- COWI Kalaallit Nunaanni pilersaarutinik sanaartukkanillu misilittagarpassuaqarpoq, ilaatigut Kalaallit Nunaanni kommunit, Naalakkersuisut, Digitaliseriinermut Aqutsisoqarfik aamma Sikuki Nuuk Harbour suleqatigalugit.
- Najukkami najugaqartutut siunnersortitut inuussutissarsiortunik ingerlatsisunik suleqateqarnissatsinnut suli pitsaanerusumik periarfissaqalissaagut aamma sullitanut suleqatinullu qanittumik attaveqarnerput nukittorsarsinnaalissallutigu, oqarpoq.
