Siunnersuisoqatigiit: Imigassamik aalakoornartulimmik imernikinneruneq pitsaaneruvoq
Imigassaq Ikiaroornartorlu Pillugit Siunnersuisooqatigiit imigassamut tunngatillugu siunnersuutinik nutaanik saqqummiussipput. Canadamiut siunnersuutaat malinniarlugit siunnersuisooqatigiit aalajangerput.
Imigassartortilluni qanoq annertutigisumik pisoqarsinnaava. Imigassaq Ikiaroornartorlu Pillugit Siunnersuisooqatigiit Canadami siunnersuutinut naapertuuttunik nutaanik siunnersuuteqarput.
Foto: Leiff Josefsen
Imigassamik sumilluunniit imerneq aarlerinartunik malitseqarsinnaavoq, taamaammat Imigassaq Ikiaroornartorlu Pillugit Siunnersuisoqatigiit siunnersuuteqarput: annikinnerusumik imernermi nappaatinut assigiinngitsunut arlalinnut, inooqataanermi pissutsinut inuiaqatigiinnullu kingunerluutaasussanut aarlerinartorsiortoqannginnerusarpoq.
Aammattaaq siunnersuut ilisimaneqarluartoq siunnersuisoqatigiinnit taakkunannga siunnersuutigineqartuartoq uteqattaarneqartuarpoq, tassa imerujoorfiusumi ataatsimi sisamat sinnernagit imernissaq.
- Siunnersuut taanna imigassaq pillugu paasisitsiniaasoqarsimaneranit Max4Tassa-mit ilisimavarput. Imigassartalinnik imertillutit, taava aalajangersimasimasunik ataatsimik taamaallaat imigaqartarit, soorlu immiaaraannarnik imaluunniit viinniinnarmik. Immiaaqqammi imigassanik kimittuunik akoorneri imernermut tamakkiisumik tamatigungajak sakkortulisitsisarmata, siunnersuisooqatigiit tusagassiutinut nalunaarutaanni allassimavoq.
Nunap sanilerisap innersuussutai qiviarneqarput
Siunnersuisooqatigiit canadamiut innersuussutaannut assingusunik siunnersuuteqarlutik allapput, tassalu imerneqarsinnaasunut killiliillutik innersuussaqannginnamik, imigassartalinnimmi imerneq sunaluunniit navianartortaqarmat.
- Nunatsinni innuttaasut tamarmik pitsaasumik peroriartornissaat inuunerissaarnissaallu qulakkeerniarutsigu, taava imigassamik atuisarnerup, pingaartumillu imerujoornermi ataatsimi imerujussuartarnerup annikillisarnissaa iliuuseqarfigisassatta pingaarnerit ilagaat. Imerujussuartarneq, matumani imerujoornermi ataatsimi tallimat sinnerlugit imertarneq inuiaqatigiinnut annertuumik kingunerluuteqartartoq ilisimavarput, soorlu ajunaarnernik, persuttaanernik, kinguaassiuutitigut atornerluinernik, pinerlunnernik aamma imminut toqunnernik, Ivalu Katajavaara Seidler Imigassaq Ikiaroornartorlu pillugit Siunnersuisooqatigiinni siulittaasoq aamma Syddansk Universitetimi Ilisimatusarfimmilu ilisimatusartoq taama oqarpoq.
Siunnersuutit tassaapput:
- Imerujussuartarneq meeqqanut taama imerfigitikkajulluni peroriartortunut sakkortuumik kingunerluuteqartartoq ilisimatusarnerit misilittakkallu takutippaat. Angerlarsimaffinni annertuumik imerfiusartuni peroriartorneq meeqqamut imminermini ajoqusiisinnaareerpoq, matumani ineriartornissaanut, peqqissusaanut aamma atugarissaarnissaanut sunniuteqarnerluttarluni, kisiannili aamma persuttaasunik, sumiginnarneqarnermik kinguaassiuutitigullu atornerlunneqarnermik misigisaqarnissaanut navianartorsiortinneqarnissaa aarlerinarnerulersarpoq. Imerujussuartarneq imminut toqunnissamut aamma imminut toqunnissamik pissusilersornermut ersiuteqalersitsisartoq ilisimavarput, taamatut pisoqannginnerani amerlanertigut imigassamik sunnertissimasoqartarmat. Imminut toquttarneq pinaveersaartinniarutsigu, taava aamma imerujussuartarneq pinaveersaartittariaqarparput, Ivalu Katajavaara Seidler oqarpoq.
Imigassaq nappaatinut 200-nit amerlanerusunut patsisaaqataavoq, matumani inuiaqatigiinni nappaataalersartunut annertuunut, soorlu kræftimut uummatillu taqaatigut nappaateqalertarnermut, taamatullu nunarsuaq tamakkerlugu toqusartut eqqarsaatigalugit, imigassaq 5,3 %-iinut pissutaasarpoq, Imigassaq Ikiaroornartorlu Pillugit Siunnersuisooqatigiit ilisimatitisipput.
