Siunnersuut akerleriissutaasoq Inatsisartunut tunniunneqarpoq
Aalisarnermut inatsisissatut siunnersuut Inatsisartuni politikerinut Naalakkersuisup Kim Kielsenip (S) nassiuppaa. Inatsisissatut siunnersuutip ilai arlallit tusarniaanermi sakkortuumik isornartorsiorneqarsimasut Naalakkersuisut attatiinnarpaat.
Aalisarnermut inatsisissatut siunnersuut ukiorpassuarni oqallisigineqareerluni maanna Inatsisartuni politikerinut nassiunneqarpoq.
Siunnersuummik tunniunneqartumik naammagisimaarinnilluni, Aalisarnermut Piniarnermullu Naalakkersuisoq Kim Kielsen (S), nalunaaruteqarpoq:
- Aalisarnermut inatsisissatut siunnersuut Inatsisartuni ilaasortat oqaluuserilerunikku tamatumalu naammassinissaa tikillugu sammilerunikku, inerititalimmik aamma pitsaasumik siumut isigisumik oqaluuserinnikkumaartut neriuppunga.
- Inatsit aalisartunut kinguaariinnut tulliuttunut tunngaviusussaavoq, aalisarnerullu ineriartortinneqarneranut pingaaruteqarluinnartussaalluni minnerunngitsumillu inuiaqatigiinnut kalaallinut tamanut iluaqutaasussaalluni, tusagassiuutinut nalunaarummi Kim Kielsen oqarpoq.
Allannguiumanngitsut
Inatsisissatut siunnersuut tusarniaanermi sakkortuumik isornartorsiorneqarpoq, pingaarutilinnullu arlalinnut tunngatillugu Naalakkersuisut allannguiumanngitsut, inatsisissatut siunnersuutip saqqummiunneqartup takutippaa.
Ilaatigut sinerissap qanittuani qaleralinniarneq pillugu inunnut ataasiakkaanut pisassiissutit tunineqarsinnaasut (PNNP) pillugit isornartorsiuineq.
Siunnersuutip ilaa taanna aalisartut ikileriarujussuarnerannik kinguneqarumaarnera pissutigalugu isornartorsiorneqarpoq, aaqqissuusseqqittoqartariaqartorli Naalakkersuisut erseqqissaapput:
- Aalisarneq pillugu Ataatsimiititaliarsuup misissuisimanera naapertorlugu aalisartunut ataasiakkaanut inuiaqatigiinnullu iluaqutaasussamik aalisarnermi tassani pitsanngorsaasoqarlunilu pitsaanerusumik ingerlatsisoqarsinnaasoq oqaatigineqarsinnaavoq, tusarniaanermi akissutinik isornartorsiuingaartunik allakkiaminni, Naalakkersuisut taama allapput.
Pissutsit patajaallisinneqarnissaannut PNNP-p siuarsaanissaa naatsorsuutigineqarpoq
Aalisarsinnaanermut akuersissutillit ataasiakkaat aalisarunnaarnissaannik pinngitsaalineqanngitsut erseqqissarneqarportaaq, kiisalu pisassiissutit aalisartunut ataasiakkaanut ajoqutissat iluaqutissanit ikinnerusut aamma Naalakkersuisut isumaqarput:
- Aalisartut ataasiakkaat TAC-ip ilaanik aalajangersimasumik namminneq naleqqussarfigisinnaasassaminnik peqalernissaat tamatumunnga pissutaavoq. PNNP-mik aaqqissuussinerup eqqunneratigut taarsigassarsisinnaaneq periarfissaalissaaq, pisassat pigisat qularnaveeqqutigineqarsinnaalissammata.
- Taamaasilluni PNNP atorlugu aalisarneq sinaakkutit eqqarsaatigalugit aalisartunut ataasiakkaanut pitsaanerusumik atugassaqartitsiffiulissaaq, aalisarneq pitsaanerusumik pilersaarusiorneqarsinnaalissammat, inatsimmi aalajangersarneqarsimasumi, aalisartoq piffissami aalajangersimasumi pisassani aallaavigalugit aningaasaliisinnaalissagami. Tamatuma saniatigut inatsit aqqutigalugu pisassiissutinit pissarsiat kingornunneqarsinnaalissapput.
Royal Greenlandip immikkut inissisimaffeqalernissaa illersoraat
Namminersorlutik Oqartussat aalisarnermik ingerlatseqatigiiffiutaata Royal Greenlandip immikkut inissisimaffeqalernissaa Naalakkersuisut nalunaarusiaminni aamma illersorpaat, ingerlatseqatigiiffik namminersortutut pisassiissutinik killilersuiffigineqanngimmat:
- Siunnersuutilli uuma suliarinerani unammilleqatigiinneq pillugu inatsimmi malittarisassat, tassunga ilanngullugu unammilleqatigiinnermut inatsimmi malittarisassat unammilleqatigiinnermut akornutaasumik tapiissuteqartarnermut tunngasut Naalakkersuisut qimerloorsimagaat maluginiaqquneqarpoq, pisassiissutinullu qummut killiliussamik qaffaaneq pisortat ingerlatseqatigiiffiinut tunngatillugu unammilleqatigiinnermut inatsimmi malittarisassanik unioqqutitsinertut taassallugu pissutissaqarsorinngilaat, ilaatigut Naalakkersuisut allapput nangillutillu:
- Umiarsuaateqarfinnut namminersortunut naleqqiulluni Royal Greenland pisassiissutinut qummut killiliussanik qanoq annertutigisumik peqartinneqassanersoq Naalakkersuisunit isumaliutigeqqissaarneqarsimavoq. Ingerlatseqatigiiffinnit namminersortunit allaanerusumik Royal Greenland ingerlatseqatigiiffinnut namminersortunut peqqussutaasinnaanngitsunik immikkut inuiaqatigiinni, sulisoqarnikkut inuiaqatigiinnilu pisussaaffeqarpoq.
Pilersaarutit naapertorlugit aalisarnermut inatsisissatut siunnersuut apriilip aqqarnani Inatsisartuni siullermeerneqassaaq.