Siunnersuut: Pimmatiginnittarneq akiorniarlugu Sermersooq suliniuteqassaaq
Kommuneqarfik Sermersuumi ingerlatsivik kommunip atuarfiini, paaqqinnittarfiini sunngiffimmilu ornittakkani pimmatiginnittarneq akiorniarlugu suliniuteqarnerulerusuppoq, tamannalu kommunalbestyrelsip maanna isummerfigissavaa.
Toqqorsivimmit assiliartalersugaq/ Leiff Josefsen
Pimmatiginninnerit pinaveersaartinniarlugit suliniuteqarneq annertusarniarlugu paaqqinnittarfinni sunngiffimmilu ornittakkani sulisut ilinniarsimanngitsut piginnaanngorsagaanissaannut immikkut aningaasaliisoqassasoq, ingerlatsivik isumaqarpoq.
"Pimmatiginnittarnerup paasisinnaanissaanut aamma pinaveersaartitsinermut akisussaaffimmik tigusinissamut tunngaviusumik perorsaaneq aamma meeqqanut isiginnittariaaseq pillugit ilisimasat pingaaruteqarneranik" suliniut tunngavilersorneqarpoq.
Missingersuusiorneq
Siunnersuut, inuusuttut kommunalbestyrelsiani ilaasortat innersuussutaannik tunngaveqarsimasoq, marlunngornermi illoqarfiit pingaarnersaata kommuniani kommunalbestyrelsimi oqaluuserineqassaaq. Aningaasartuutit ilaneqartut ukiaru 2025-mut missingersuutit aalajangersarneqarneranni ilanngunneqarnissaat siunnersuutigineqarpoq.
Meeqqanut Atuarfeqarnermullu Ingerlatsivimmit suliamik nalilersuineq tunngavigalugu innersuussisoqarpoq.
Ullumikkut meeqqanik qanimut sullissisut qanimut suleqatigineqartut aamma piginnaanngorsarnissamik neqeroorfigineqartartut, “pimmatiginninnermut isiginnittariaaseq” pillugu saqqummiussisoqartartoq, workshoppertitsisoqartartoq pimmatiginninnermillu akiuiniarnermut periusissianik sulianut tapersersuisoqartoq ilisimatitsissutaavoq.
- Immikkoortunut tamanut angummanniarneq ajornarsinnaammat atuarfinni, meeqqerivinni aamma atuareernerup kingorna ornittakkani pimmatiginnittarnermut akiuiniarneq patajaallisarniarlugu peqqissutsimut pinaveersaartitsinermullu siunnersortinik allanik marlunnik atorfinitsitsinissamut 2025-mut missingersuusiornermut qinnuteqartoqarpoq, kommunimi politikerinut suliamik takutitsinermi allassimavoq.
Suliassaqarfik ukkatarisassatut pingaaruteqartoq
Pimmatiginninnermik pitsaaliuineq immikkut ukkatarisassatut pingaaruteqartoq naqissuserneqarpoq, "pimmatiginninneq atugarissaarnermut ilikkagaqartarnermullu annertoorujussuarmik kinguneqartarmat".
- Kommunimi atuarfinni tamani kiserliorneq aamma pimmatiginnittarneq pisartoq Kommuneqarfik Sermersuumi paasissutissat takutippaat, ilisimatitsissutaavoq.
