Siunnersuut: Sapaatip-akunneranut ulluni sisamani sulisoqartalernissaa misilinneqarli
Sapaatip-akunneranut ulluni sisamani sulinermik misiliinissaq isumassarsiatsialaanersoq Kommuneqarfik Sermersuumi kommunalbestyrelsip ataatsimiinnermini aalajangissavaa.
Kommuneqarfik Sermersuumi kommunalbestyrelsip sapaatip-akunneranut ulluni sisamani sulisarnissap misiliutitut atulersinneqarnissaanik siunnersuut aggustip 27-ani oqaluuserissavaa.
Assiliisoq: Leiff Josefsen
Nuummi, Paamiuni Tasiilamilu meeqqerivinni marlunni utoqqarnullu sullissivinni misiliutaasumik sapaatip-akunneranut ulluni sisamani sulisartoqartalernissaanik Demokraatit sinnerlugit illoqarfiit pingaarnersaata kommuniani kommunalbestyrelsimut ilaasortap Poul Petersenip, politikkikkut tapersersorneqarnissani neriuutigaa. Imaluunniit sapaatip-akunneranut sulisarnerup akunnernit 40-nit 37-nut ikilisinneqarnissaannik.
- Sulisutta namminneq inuuneqarnerminnut aamma suliffeqarnerminnut tunngatillugu annerusumik angusaqarsinnaanerat periarfissaalluartutut isigaarput, aamma Kommuneqarfik Sermersooq taamaalilluni suliffigissallugu nuannernerulerlunilu pilerinarnerulissaaq, siunnersuummut tunngavilersuummini Poul Petersen oqarpoq.
Piumassuseq malillugu ingerlanneqassasoq
"Sulinermik inuussutissarsiuteqartut kattuffii siulersuisullu peqatigiiffii aaqqissuussaq pillugu oqaloqatiginissaannut qaaqqunissaat“ aallaaviussasoq, taanna nassuiaavoq.
Misiliutaasumik ingerlatsiffiusuni piumassuseq malillugu misiliineq ingerlanneqassasoq erseqqissarneqarpoq, tassa ullut suliffiit sisamaassanersut tallimaassanersulluunniit nammineq aalajangerneqassalluni.
- Ulluunerani paaqqinnittarfiit utoqqarnillu sullissiviit sulisoqarniarneq eqqarsaatigalugu ajornartorsiorfiorfiungaarput. Allaat naammattunik sulisussarsiorniarneq taartaasartussanillu pissarsiniartarneq ajornartorsiutigingaarparput, taamatut politikkeri siunnersuummini kommunalbestyrelsip aggustip 27-ani ataatsimiinnerani oqaluuserineqartussami allappoq.
- Pisariillisaanerusinnaaneq iluaqutitalimmik misissorsinnaavarput. Akisuallaarnissaanik tunngavilersuuteqarneq unittoorfiginaveersaassavarput, taamaattumik siullertut suliniummik aallartitsinissatsinni suliassaqarfimmik ataatsimik tamaviaarfiunerpaamik aallarniuteqarnissarput tassanilu nammitsinnik misilittakkatsinnik pilersitsinissarput innersuussutigalugulu kajumissaarutigissavara, Poul Petersen oqarpoq, ilassuteqarlunilu "akunnerni ikinnerusuni sulisarneq inuiaqatigiinnut aningaasaqarnikkut qanoq iluaqutissartaqarnersoq suli misissuiffigineqanngitsoq".
Annertunerusumik naammassisaqarneq
Piffissarujussuaq kajumissutsimik sulinermut, ilaqutariinnermut meeqqanullu piffissaqarnerunermut atorneqarsinnaasoq, aamma suliffeqarfinni angusaqarneruneq ingerlalluarnerunerlu annertunerusumik naammassisaqarfiusoq taassuma takorloorpaa.
- Tamakku pitsaanerusumik aningaasaqarnermut tunngavissaalluarnissaat qularutissaanngilaq. Piffissap suliffiusussap qanoq inissinneqarnissaanut tunngatillugu aalajangersimasumik politikkikkut aalajangiisoqanngilaq, kisianni suliffimmi atugarliornermut ersiutaasut iliuuseqarfigivavut eqqumaffigineqarnerulernissaat eqqartorneqartarnissaallu ammaanniarnissaa siunertaralugu, siunnersuuteqartoq naggasiivoq.
