Sivisuumik uninngareerluni: Avalak Odense pilersinneqaqqittoq

- Qassissuulluta katersuuteriarluta Avalak Odense aallarteqqipparput, Najana Lyberth Kristensen Atlantikup avannaamioqatigiivisa Odensemi soqutiginartumik oqaloqatigigatsinni oqarpoq.

Najana Lyberth Kristensen kalaallit Danmarkimi ilinniartut kattuffianni siulittaasuuvoq, kattuffillu taanna pingasunik, tassa Københavnimi, Århusimi Odensemi peqatigiiffinnik immikkoortortaqarpoq. Najana Lyberth Kristensen Avalak Odensep siulersuisuini aamma ilaasortaavoq. Pisortat kattuffik Avalammut tapiissutigineqartartut immikkoortortaanut pingasunut peqatigiiffiusunut agguaanneqartarput. Avalak Odense 40-t missaannik ilaasortaqarpoq, kattuffillu Avalak Danmarkimi tamarmi katillugit 300-t missaannik ilaasortaqarluni.

Kalaallit Danmarkimi ilinniartut sapinngisamik atugarissaarnissaannik periarfissagissaarnissaannillu qularnaarisooqataanissaq Avalammi siunertaavoq. Kattuffik soorlu ataatsimuualaarnissamik, ilinniakkanut attuumassutilinnik soqutiginartumik oqallisaaruteqarnertalimmik saqqummiisoqarnissaanik aaqqissuisarpoq, Danmarkimilu tamarmi ilaasortaminut ukiumut ataasiarluni sapaatit akunnerisa naanerisa ilaanni kateritsitsisarluni. Tassa Avalak kalaallit Danmarkimi ilinniartunut kattuffiuvoq, Danmarkimilu ilinniartut allat kattuffiat, tassa DSF Danske Studerendes Fællesråd suleqatigilluinnarlugu.

Kalaallit Danmarkimi ilinniartut Avalak ikiortiseralugu saaffigisassagaat Najana Lyberth Kristensenip soorunami kissaatigaa, kattuffimmi Avalak ilinniartut ilinniakkamik taamaatitsiinnannginnissaanut attaveqaqatigiiffiulluarmat.

- Assigiinngitsorpassuarnik saaffiginnissutilereqataaneq ilaasortattalu iluaqutigisinnaasaannik periarfissanik pilersitsineq inuttut pissarsiaqaatigisaqaara.

- Taamaalillutalu nunarput pillugu Danmarkimi nunanilu allani soorunami ilisimasaqarnerulersitsisarpugut.

Misigisartuujusoq

Najana Lyberth Kristensen Tasiilami ukiut 26-t matuma siorna inunngoramili maannamut misigisarpassuaqarpoq. Pingasunik ukioqartoq Nuummut nuupput. Danmarkimi HF-erpoq. Aamma ukiuni sisamani sakkutuujuvoq.

- Sakkutuujunera misigisarpassuaqarfigaara, Najana Lyberth Kristensen nangippoq.

- Najugaqatigiit aqqaneq-marluuvugut, niviarsiaqqat sisamaavugut nukappiaqqallu arfineq-pingasuullutik. Tamannalu naleqqussarnissamik suleqatigiinnissamillu ilinniarfigeqaara, qallunaatullu piffissap sivikitsup ingerlanerinnaani oqallorissiallaatigingaatsiarlugu, Najana qiimmatsassimaarluni oqarpoq.

Najana Lyberth Odensemi SDU Syddansk Universitetimi ukiup aappassaanik naajuitsorsiortunngorniartuuvoq, tassa kemiilerisunngorniartuuvoq. Taassuma ilinniarnini nuannaraa, naammassigunilu avatangiisilerinermik ujassiornermilluunniit suliaqarnissi takorloorlugu.

- Ilinniagara sorpassuarnut qujanartumik atorsinnaavoq, Najana erseqqissaavoq.

Najana Lyberth Kristensen angalatuvoq. Arninilu ilaatigut Vietnamimut, Kinamut, Afrika Kujallermut, Egyptenimut, Brasiliamut, Guatemalamut Mexicomullu angalanikuupput. Aamma kisimi Europami nunanut assigiinngitsorpassuarnut angalanikuuvoq, efterskolerallaramilu Nepalimut USA-mullu paasisassarsiorlutik angalanikuullutik, tamatumalu saniatigut Grækenlandimi Athenimi ukiup aggaani najugaqarnikuulluni.

- Nunani allani inooriaatsit kulturillu misigalugit nuanneqalunilu pisuunnguallannaqaaq. Paasisaqarnaqaaq misigisassarinngisassaraluanillu misigisaqarnaqaluni. Inuunerma sinnerani atorsinnaasannik puigunaatsorsiffigaara, Najana Lyberth Kristensen nangippoq.

Nunanit tamalaaneersunik suleqateqartoq

Avalaap Arctic Youth Conference, Nordic Organisational Meeting DSF Danske Studerendes Fællesrådilu silap pissusianut ilinniartunillu siuarsaanermut tunngasuni suleqatigai. Canadap Danmarkimi sinniisuutitaanik aamma suleqateqarnera taavalu Kinap aallartitaqarfianit Norgellu aallartitaqarfianit saaffigineqartarnera Kalaallit Nunaata soqutigineqarneranik ersersitsivoq.

- Alaskami Arctic Encounter i Anchoragemut juulip naanerani peqataanissannut tapiiffigineqarpunga. Soorunami qilanaaqaanga, Issittumimi avatangiisilerinermut ineriartortitsinermilu siuarsaanermut tunngasuni soqutigisannut attuumassuteqarluinnartuummat, Najana Lyberth Kristensen naggasiivoq.

Kalaallit Region Syddanmarkimi ilinniarfinni assigiinngitsuni ilinniartut 92-iusut, efterskolertut 72-iusut højskolertullu qulingiluaasut Kalaallit Odensemi Illutaat attaveqatigiittarfigaat.