Sodavandit, immiaaqqat tupallu 2023-mi tunineqarnerpaapput

Isumaginninnermut Aqutsisoqarfimmi pinaveersaartitsinermut immikkoortortaqarfiup Paarisap niuertarfiit suleqatigai innuttaasut peqqinnarnerusumik inuuneqalernissaannut kajumissaarniarlugit.

2023-mi tupat/cigarettit tunineqarnerpaat pingajuattut inissipput, 2022-mi tulleriiaakkat arfernanniillutik.

Aammattaaq naatitat 2022-miit nioqqutigineqarnerpaat pingajuattut inissisimapput, 2023-mi sisamaattut inissillutik. 2022-mi naatitat nioqqutigineqarnerpaat arfineq-aappaanniipput, 2023-milu qulingiluaattut inissillutik.

Naatitat nutaat tunisat amerleriaateqalaarput

Naak naatitat tunineqarnerpaat akornanni ikiliartoraluartut, naatitat nutaat 2023-mi ukiup siulianut sanilliullugit 1 procentimik tunineqarnerulersimapput.

Aammattaaq nioqqutissat matuersaaserfimmik ilisarnaasikkat 2023-mi ukiup siulianut sanilliullugu 2 procentimik amerleriarsimapput. 2022-mi nioqqutissat tunineqarnerpaat 15-iinnaat Paarisamit nalunaarsorneqarsimapput, ukioq mannalu nioqqutissat 15-it ilanngunneqarsimapput.

Tunineqarnerpaat katillugit 30-t ataatsimoorluni pointilersueriaaseq tunngavigalugu naatsorsorneqarsimapput, nioqqutissat 30-t tunineqarnerpaat 30 pointinik tunineqartarput, tullii 29 pointinik tunineqartarlutik, taamatullu ingerlaannarlutik. Naggataatigut nioqqutissat immikkoortut tamarmik immikkut pointinik agguataarneqartarput, KATTULLUTA INUUNERITTA – SAMMEN OM DET GODE LIV 2023-mi ukiumoortumik nalunaarusiaq Paarisameersoq taama allappoq.

Peqatigiilluni suleqatigiinneq 2020-2030

Paarisa, Brugseni, Pilersuisoq Pisiffillu peqatigiillutik suleqatigiinnerminni siunertaraat peqqinnartumik ileqqoqarnissaq pillugu ilisimasanik isumassarsiorfissanillu innuttaasunut siammarterineq, toqqagassaq peqqinnartoq oqinnerusumik pissusissamisoortumillu toqqagassanngortinnissaa, nerisaqarnermut innersuussutinik qulinik atuisut amerlinissaat aammalu peqqinnartumik nerisaqarnerup naleqquttumillu imigassartortarnerup siuarsarneqarnissaa.

2024-mi angorusutat

2024-mi suleqatigiinnerup ingerlatiinnarnissaa sulissutigineqassaaq, taamaalilluni nerisassat peqqinnartut kaaviiaartitaqarnerpaanissaat anguniarneqassaaq. Anguniakkat 2023-meersut makku ingerlateqqinnarneqassapput: 

-Naatitanik qerisunik tunisinerup annertusinissaa 

-Naatitanik nutaanik tunisinerup annertusinissaa 

-Nioqqutissanik matuersaaserfimmik ilisarnaasikkanik tunisinerup annertusinissa 

-Nioqqutissat tunineqarnerpaat 30-t allattorsimaffianni nioqqutissat peqqinnartut amerlinissaat 

-Suleqatigiinneq suleqatigiinnerullu ilisarnaataa pillugu ilisimasat annertusinissaat. Ilisarnaat pillugu qanorlu isumaqarneranik ilisimannittut 75%-inngornissaat siunertaavoq

Massakkut imeruersaatinik aalakoornartortaqanngitsunik tunisaqarnerup annerusinissaat suleqatigiit aallartippaat.