Sondre angusarissaartoq – Ukaleq ajoqusersimasut nakorsiartarfimmukartariaqartoq

Sisoraaserluni ooqattaasarluni unammiuaarnerit nunanit tamalaanit peqataaffigineqartut sapaatip-akunnerata naanerani aallartipput. Tassanilu Ukaleq aamma Sondre Slettemark peqataapput.

Sondre Slettemark Sverigemi Idremi IBU Senior Cupertoqarnerani peqataasunit 126-usunit 21-tut inissittoq Kalaallit Nunaanni Biathlonertartut Kattuffiat nalunaarpoq. Unammeqataasuni arfineq-pingasuni ooqattaasarnerni marlunni uniunngivittunut taanna ilaavoq.

- Angusaq assut naammagisimaarpara. Ooqattaasarnermi misigisimavunga aallaat aqukkuminartillugu. Ooqattaasarnerni marlunni siornamut sanilliullugu sekundinik 10-15-inik sukkaneruvunga.

- Ingerlaarfitsinni ingerlalluarpunga. Ingerlaarfiulli qiteqqunnerani arpattartoq alla nukittunerusoq malikkakku kukkussutigaara, kaajallaanermimi kingullermi sakkortunaarsivunga piffissamillu annaasaqaatigilaarlugu. Tamaalli isagalugu naammagisimaarinnippunga, Sondre Slettemark oqarpoq.

Ukaleq Slettemarkimulli ukioq unammiffiusoq aallartilluarpallaanngilaq, taanna sermerasaartukkut ammukajaakkoortilluni orluvoq. Ajoqusersimasunut nakorsiartarfimmut ajunnginnerluni misissortikkiartorami qujanartumik napisoqarsimanngitsoq paasivaa.

Inuusuttuni nunarsuarmi pissartaasimasoq maanna sungiusarpoq sisorarsinnaanngikkallarlunili.

IBU Cup tulliuttoq Norgemi Geilomi pissammat sisorartartut taakku marluk maanna tassaniipput, tamatumalu kingorna Østrigimut World Cupimut IBU Cupimullu peqataajartussallutik. Ukiortaami Tysklandimi World Cup ingerlanneqassaaq, Kalaallit Nunaanni Biathlonertartut Kattuffiat ilisimatitsivoq.