Sondre Slettemark sapaatip akunnerani inersimasuni unammeqataanermini ingerlalluartoq

Sondre Slettemark Polenimi Tysklandimilu Junior-cup-imi peqataanini naammassivaa. Unammissutini marlunni ajugaavoq ataatsimilu nr. 2-nngorluni.

Maanna Italiamiippoq inersimasunut unammeqataalluni. Sapaatip akunnera siulleq ilimagisamit ingerlalluarneruvoq. Pingasunngornermi februaarip tallimaani 10 kilometerimut sprintimi normu 8-nngorpoq. Tallimanngorneq februaarip arfineq-aappaanni 12,5 kilometerimut malersuulluni arpannermi normu 14-iulluni apuuppoq arfininngornermilu februaarip arfineq-pingajuanni 15 kilometerimut ataatsikkut aallarluni arpannermi normu 13-iulluni apuulluni.

Sondre Slettemarkip malersunneermi aallaqqaammut qanoq pisoqarsimanera oqaluttuaraa, oqarporlusooq arpattut malinnaaviginiarlugit takutitsilluartariaqarsimalluni:

- Norgemiut marluk tununni arpattut ingammik aarleqqutigaakka. Aammami 20-riarluni ooqattaasarnermi pingasut uniorpakka. Tamanna pitsaasorujussuuvoq, kisianni eqqaanniittut aamma taama pitsaatigisumik pitsaanermilluunniit eqqoriaapput, taamaattumik inissisimavinni arfinilinnik kinguariarpunga normu 14-inngorlunga. Suli arpanninni pitsaanerpaanut ilaavoq, taamaattumik naammagisimaarpara, Sondre Slettemark oqarpoq.

Ajugaasumit minutsimik ataatsimik sekundinillu 37-nik kinguaqqavoq, 20-riarluni ooqattaasanermi pingasut iluatsinngitsoorpai.

Arpaffimmi sisorarluarnerusartoq

Sondre Slettemarkip ooqattaasarnermini nalunnginneqaatigaa arpaffiit aqqutaanni sisorarluarnerusarnini, tamannalu arfininngornermi ataatsikkut aallarluni arpannermi takutippaa.

Apuuffissamut normu 13-iulluni apuuppoq, Norgemiu Johannes Dale Skjevdal, nunanut allanut unammisartoq sekundinik 59-iinnarnik inulaarlugu.

- Ridnaunimi (Italiami, aaqq.) ullut imaannaanngitsut aqqusaarpakka. Ullut tamaasa ilimagisannit ingerlalluarnerusarpunga. Qasujaappunga unammisaqattaarninnilu pitsaaneruleriartortutut ippunga. Arpaffiit ilaanni pitsaanerniit sekundialunnik kinguariartarpunga, kisianni arpaffiup ilaani taakkunannga sukkaneruvunga, oqarpoq.

Sapaatip-akunnerata tulliani ooqattaasarluni sisorarluni VM-ertoqarnissaanut, tamatumalu kingorna inuusuttut ooqattaasarlutik sisorarlutik VM-ertoqarnissaanut peqataanissani piareersarfigalugu Sondre Slettemark oqaatigaa.

- Maanna angusarissaarninnit neriuutigaara aningaasaliisussanik ataatsimik marlunnilluunniit nassaarsinnaallunga, taamaalillungalu timersornera suli pimoorullugu ingerlassinnaalissavara. Minnerunngitsumik naatsorsuutigaara aappaagu OL-imut anngussinnaallunga, oqarpoq.