Soraarnerit pingasut Nuummeersut, Kirsten Holm, Ester
Rosing aamma Marie Bredtofte sisamanngormat juunip
27-ani isumaginninnermut naalakkersuisumut Jess Svanemukarput,
atsiornerit 2.391-it tunniukkiartorlugit. Taakkunani utoqqaat atukkamikkut
aningaasaqarnermikkullu pitsanngorsaavigineqarnissartik piumasaraat.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Soraarnerit pingasut Nuummeersut, Kirsten Holm, Ester
Rosing aamma Marie Bredtofte sisamanngormat juunip
27-ani isumaginninnermut naalakkersuisumut Jess Svanemukarput,
atsiornerit 2.391-it tunniukkiartorlugit. Taakkunani utoqqaat atukkamikkut
aningaasaqarnermikkullu pitsanngorsaavigineqarnissartik piumasaraat.
– Suliniaqatigiiffik Soraarneq
sinnerlugu soraarnerussutisiaqalersimasut atugaasa pitsanngorsarnissaannut
peqataarusukkatta, Kirsten Holm oqarpoq.
Taassuma mappe atsiornernik imalik tunniuppaa,
soraarnerussutisiallit atugaasa pitsanngorsarneqarnissaannik siunertaqarluni
suliniutaasoq, ilaatigut aningaasaqarnerminnut tunngasumik imalu
tunngavilersuillutik:
- Kinguaariit maanna utoqqanngortut inuiaqatigiinnik
ullumikkut atuuttunik ukiorpassuarni pilersitseqataasimapput. Inuiaqatigiittut
ataatsimoorluta qulakkeertariaqarparput utoqqaat utoqqalinerminni
aningaasatigut toqqissisimanissaat allaffissornikkullu unammilligassaqannginnissaat,
taamaattumillu utoqqaat aningaasat tigusartagaasa amerlineqarnissaat
qulakkeerusupparput.
Jess Svane atsiornernik katersinermut qujavoq
siunnersuutillu tiguneqartut misissorusullugit.
– Naluneqanngitsutut Naalakkersuisut
utoqqalinersiallit pilersuisussatut pisussaaffiat atorunnaarsippaat. Aappariit
utoqqalinersiallillu kisermaat tamanna utoqqalinersiamikkut aningaasatigut
malugisinnaassavaat, tassani aamma isertinneqarsinnaasut
qaffassimavavut utoqqalinersianut ilanngaatigineqannginneranni, Jess
Svane oqarpoq nassuiarlugulu Naalakkersuisut utoqqarnut periusissiaq 2027-mut
atuuttoq aallaavigalugu suliniuteqartut, tassani aamma utoqqaat illuini
utoqqarnik paaqqutarinninnerup isumaginninnerullu pitsanngorsarneqarnissaa,
sulisut piginnaanngorsagaanissaat kommunillu peqatigalugit utoqqarnut
inissianik neqeroorutip pitsanngorsarneqarnissaa misissussagaat.
Soraarnerussutisiat akikillisaatillu pitsaanerusut
Utoqqalinersiallit aningaasanik amerlanerusunik
tigusaqartarnissartik piumasaraat.
– Erseqqissaatigineqassaaq tassaagatta
soraarnerussutisiaqalersimasut eqimattat namminneq kajumissutsiminnik
naapittartut, kattuffiunngilagut peqatigiiffiunataluunniit, pissutsilli
atukkatta pitsanngorsarnissaannut peqataarusuppugut.
Soraarnerussutisiaqalersunut akileraarutitigut tatisinerup annikillisinnissaa
aamma inummut ilanngaatip qaffannissaa
sulissutigerusuppavut, Kirsten Holm soraarnerussutisiaqalersimasut eqimattat
ataatsimiinnerminni, suliniuteqartup Apaa Chemnitzip aaqqissugaanik,
ajoraluartumilli naalakkersuisumik ataatsimeeqateqarnermi
peqataasinnaasimanngitsup, piumasaqaataasa ilaat pillugit oqarpoq.
Tamatuma saniatigut suleqatigiit
soraarnerussutisialinnut akikillisaataasartut amerlinissaat Naalakkersuisunut
kajumissaarutigaat:
– Arctic Umiaq Linep
utoqqalinersialinnut billetinut 50 procentimik akikillisaasarnera
takoreerparput. Air Greenlandimulli saaffiginnikkatta akillutik oqaatigaat,
“fly n’ sleep”-imut akinik misissuisinnaalluta, tamannali innuttaasunut tamanut
atuuppoq, utoqqalinersiallit kisiisa pinnagit. Uagut utoqqalinersiallit aamma
sinerissami ilaqutaqartarpugut nalliuttorsiornernullu peqataarusuttarluta,
soorlu apersortittunut, katittunut imaluunniit qanigisatta ilaat
perulunnartumik napparsimalerpat najorusuttarlugit, akillu taamaatillugit
billetinik taama akisutigisunik inniminniineq ajornaatsuinnaanani, Kirsten Holm
oqarpoq.
– Sammisaq
soqutiginarpoq Naalakkersuisullu ataatsimiinneranni oqaluuserineqartussaalluni.
Danmarkimisut utoqqalinersianut kortinik akikillisaataasunik
pilersitsisoqarsinnaagaluarpoq. Aammattaaq utoqqalinersianut kortinik
akikillisaatinik pilersitsisoqarsinnaagaluarpat, pisiniarfinni ulluinnarni
atorneqarsinnaasunik, tamanna ilaqutariit aningaasaqarnerannut
oqilisaataasinnaavoq. Tamanna misissoqqissaarniarpara, Jess Svane oqarpoq.
Tjenestemandiusimasunut soraarnerussutisiat
Ilinniartitsisut kattuffianni IMAK-imi
siulittaasuusimasoq Sivso Dorph upernaaq ammasumik allagaqarluni Danmarkimi
aningaasaqarnermut ministerimut Nicolai Wammenimut, inatsisinik
atuutsitsinermut ministerimut Peter Hummelgaardimut aningaasaqarnermullu naalakkersuisumut
Erik Jensenimut allappoq “tjenestemandit soraarninngorsimasut oqartussaasunit immikkoortinneqartartut”.
Suleqatigiit tjenestemandit soraarnerussutisiaasa
anmarkimitut naleqqersuunneqarsinnaalernissaat kissaatigaat.
-Allaannginnami
tjenestemanditut assigiimmik soraarnerussutisiaqarnissatsinnut erliguunneqartugut, Ester Rosing oqarpoq
nangillunilu:
– Erik Jensenip tjenestemandiusimasut
soraarnerussutisiallit suli Nunatsinni najugaqartut qanoq
iliuuseqarfiginiarnerai paaserusupparput. Danmarkimut
nuuttariaqannginniassagatta Inatsisartuni Naalakkersuisunilu politikerit qanoq
iliuuseqassappat? Ester Rosing aperivoq, taassumalu ilinniartitsisut kattuffiat
IMAK Nunatsinni Danmarkimilu atorfillit
soraarnerussutisiallit atugaannik misissuisimammat nuannaarutigaa, tassanilu
paasinarsilluni atorfillit Nunatsinnit Danmarkimut nuunnermikkut aningaasatigut
iluanaaruteqarluarsinnaasut.
Aningaasaqarnermut naalakkersuisoq Erik Jensen (S)
Peter Olsenip (IA) atorfillit soraarnerussutisiaat pillugit paragraf 37
naapertorlugu apeqqutaanut akivoq, atorfillit soraarnerussutisiaasa
assigiinngissutaasa nassuiarneqarsinnaanerat misissorini.
Nunatsinni Danmarkimilu tjenestemandit soraarnerussutisiaat assigiinngitsunik
ineriartortinneqarsimasut, akissummi allassimavoq. Nunatsinnilu tjenestemandit
soraarnerussutisiaat aatsaat nalimmassarneqarsinnaasut tjenestemandit
Nunatsinni, Naalagaaffimmi, Namminersorlutik Oqartussani kommuninillu
atorfillit pillugit isumaqatiginninniarnerit naammassineqareerpata.
Isumaqatiginninniarnerit sivitsortooraangata nalimmassaaniarneq
sivisusinnaasarpoq.
- Oqariartuutersi aningaasaqarnermut
naalakkersuisumut, atorfillit soraarnerussutisiaqarnissaannut akisussaasumut
ingerlateqqikkumaarlugu neriorsuutigaara, Jess Svane oqarpoq.