Soraarnerussutisianut aaqqissuusseqqinneq: Ileqqaartussaatitaanerup allanngortinnissaa oqaluuserineqarpoq
Naalakkersuisut soraarnerussutisiaqalernissamut aaqqissuusseqqinnermut atatillugu suut misissorneqassanersut pilersaarusiorpaat. Ileqqaartussaatitaanermut pisussaaffik arlarlitsigut allanngortinneqarsinnaavoq.
Naalakkersuisut soraarnerussutisiaqalernissamut aaqqissuusseqqinnermut atatillugu ukiut katersuiffiusinnaasut allanngortinneqarnissaat misissorniarlugu piareersimapput.
Assiliisoq: Leiff Josefsen
Naalakkersuisut “isumaginninnikkut oqimaaqatigiittumik inuiaqatigiillu aningaasaqarneranni siunissamut isumannaakkamik" 2025-mi soraarnerussutisiaqalernissamut aaqqissuusseqqinneq nutaaq pillugu politikkikkut isumaqatigiissuteqartoqarnissaa siunertaraat. Namminersorlutik Oqartussat nittartakkaminni taama allapput.
Tamanna pillugu Naalakkersuisut suut allanngortinniarnerlugit takorluukkatik taamaammallu misissorniarlugit saqqummiuppaat.
Ukiut inuuffigisassaat sinneruttut
Soraarnerussutisiaqalernissamut aaqqissuussineq kalaallit ukiut inuuffigisassaat sinneruttut tunngavigalugu pilersinneqarsinnaanersoq, ullumikkut qallunaat aaqqissuussinerattut pinnani paasissutissiissutigineqarpoq. Tamanna aningaasat pissarsiarineqartartut amerlassusaannut sunniuteqassaaq, taamatullu innuttaasut agguaqatigiissillugu qallunaanit inuunikinnerummata soraarnerussutisiaqalernissamut aningaasanik amerlanerusunik pisoqartalersinnaassalluni.
Soraarnerussutisianik akiliinermik eqaannerulersitsisinnaanerup misissorneqarnissaa pilersaarutigineqarpoq. Soraarnerussutisianut akilikkat ilaat amerlanerusut kittaartumik soraarnerussutisianut inissinneqarsinnaanerannik periarfissamik misissuisoqassalluni.
Innuttaasunut soqutiginarsinnaasoq alla tassaavoq ukiut ileqqaarfiusup allanngortinneri. Periarfissat marluk Naalakkersuisut tikkuarpaat:
- Qaqugukkut ileqqaartussaatitaanerup aallartittarnerani ukiorisanik qaffaaneq - ass. 18-nit 21-nut.
- Ileqqaartussaatitaasup atorunnaarnerani ukiorisat appartinneqarnerat - ass. 63-init 61-inut.
Akiitsunik akilersuineq
Akileraartarnermut aaqqissuussineq iluarsartuunnissaa aamma pilersaarutaavoq, taamaalilluni akileraartarnermut procenti aamma pensionisiat katersornerannut procenti ersersinneqassallutik.
Soraarnerussutisiassanut katersorneqartussaatitaasut naammassinngitsuukkat pillugit nammineq piumassutsimik aaqqissuussinissamut periarfissat aamma misissorniarneqarput. Innuttaasup nammineerluni allaffissornikkut pisariitsumik soraarnerussutisiassaminut katersugassaminut akiitsuminik akiliisinnaaneranik periarfissanik misissuisoqassalluni.
Naalakkersuisut ilanngullugu "soraarnerussutisiassanik aaqqissuussinermik piujuartitsinerusumut, nunatsinnilu pissutsinut nalimmassaanissamut siunnerfeqartut" nalunaarutigaat.
