Soraarnerussutisiaqalernissamut katersisussaatitaaneq allanngortinneqariaannaavoq
Pingaartumik ullumikkut illuatungiliuttutut inissisimasut piumasaqarput soraarnerussutisiaqalernissamut katersisussaatitaanermik aaqqissuussinerup atorunnaarsinneqarnissaa pillugu. - Inuit namminneq isertitaminnik qanoq aqutserusunnertik aalajangissavaat, ataatsimut isigalugu atorunnaarsitsinissamik piumasaqartut taamak tunngavilersuipput.
Pisortat pinngitsaaliillutik nangittumik soraarnerussutisiaqalernissamut katersisussaatitaanermik ingerlatsiinnassappat, taamaalillutillu sulinermikkut isertitallit illuartitsisussaatitaanerat ingerlaannarluni, imaluunniit namminneq isertitatik qanoq atussanerlugit aalajangiisinnaatitaaqqilissappat? Apeqqut taanna partiit akornanni avissaartuutsitsinikuusoq allanngortinneqassagunarpoq.
Assiliisoq (toqqorsivimmit): Leiff Josefsen
Soraarnerussutisiaqalernissamut katersisussaatitaaneq 2018-mi aallartimmalli, oqallinnerit sakkortusisinnaasarlutik ingerlanneqartarput, pingaartumik aaqqissuussinerup siunertamisut iluaqutaanera pineqaraangat.
Partiit amerliartuinnartut isumaqarput pinngitsoorani katersisussaatitaaneq siunertaminut naapertuukkunnaarsimasoq, taamaattumik aaqqissuussineq atorunnaarsinneqartariaqartoq.
A: Innuttaasut kiffaanngissuseqarnerat unioqqutinneqarpoq
Atassut isumaqarpoq pinngitsaaliilluni ileqqaartussaatitsineq innuttaasut kiffaanngissuseqarnerannik unioqqutitsinerusoq:
- Atassummiit inuit nammineersinnaassusaat tatigaarput, atukkatillu naapertorlugit nammineerlutik aalajangersinnaasariaqarpaat qaqugu katersillutik aallartissanerlutik, qanorlu annertutigisumik ileqqaarisarusunnerlutik.
- Inuup kiffaanngissusaa innarlinngisaannartigu. Ilinniakkaminnik naammasserlaat illusinissaminnut katersinissaraluat innarlerneqarpoq, sulilerunik ingerlaannaq pinngitsaaliissummik akiliisussanngortinaanerat pillugu. Tassa nammineerusunnermut killilersuineq. partii qineqqusaarummini erseqqissaavoq.
D: Aaqqissuussineq siunertamut naapertuutinngilaq
Demokraatit innersuussutigaat partiit IA, Siumut, Naleraq, Demokraatit aamma Atassut 2016-imi
aalajangersimasut soraarnerussutissiaqalernermut aaqqissuussinermut peqataasussaatitaanerup
atuutilersinneqarnissaa, siunnertarineqarluni siunissami utoqqaat toqqissisimanarnerusumik
soraarnerussutisiaqalernissaat.
Taamaattorli nassuerutigisariaqarparput soraarnerussutissiaqalernissamut aaqqissuussinermut
peqataasussaatitaanermik aaqqissut inatsimmi siunertarineqartumut naapertuutinngitsoq.
Ilaatigummi takusinnaavarput innuttaasut ilaat katersitinneqartartut uffa nammineerlutik
katersaqareerlutik. Inatsit aamma allanngortinneqarpoq, innuttaasut akissarsiakinnerpaat
katersisussaatitaanerat atorunnaarsillugu. Naak taakkorpiaat pillugit inatsisiliortoqaraluartoq.
Taakku peqqutaallutik soraarnerussutisiaqalernissamut aaqqissuussinermut
peqataasussaatitaanermik aaqqissut isumaaruppoq. Demokraatinilu isumaqarpugut inatsit
atorunnaarsittariaqartoq, partii qineqqusaarummini erseqqissaavoq.
N: Namminneq aalajangiisinnaaneq aallaaviusariaqarpoq
Naleraq Atassutip Demokraatillu atorunnaarsitsinissamik siunertaqarnerannut tapersersuivoq, aammalu qinigaaffimmi maanna qaangiuttumi Inatsisartunut siunnersuummik saqqummiussimavoq aaqqissuussineq kajumissuseq naapertorlugu nammineq aalajangigassanngortinneqassasoq.
- Qujanartumik takusinnaavarput sulisartorpassuaqartoq soraarnerussutisiaqalernissamut
ileqqaagaqarnissamut ersarissumik ilinniartinneqarsimasunik, taamaattumik inatsit
asuliinnavissimanngilaq. Kisianni ajoraluartumik aamma takusinnaavarput inatsit
isumaginninnikkut eqquinerluttoq, tamatumanilu pingaartumik ilaqutariit SIK tunngavigalugu
akissarsiaqartut naammattusaariniarnerminnik ajornartorsiuteqartut, taama Naleraq ukiakkut ataatsimiinnermi 2022-mi siunnersuumminni tunngavilersuuteqarpoq.
Partiip siulittaasuata, Pele Brobergip aamma oqaatigaa inatsisip atorunnaarsinneqannginnerani qulakkeertariaqartoq, pinngitsaalisaallutik katersisimasut pisinnaatitaaffeqarnissaat namminneq katersaatiminnik tamakkiisumik aqutsinissamut:
- Inuk aalajangissaguni katersani siusissukkut tigussallugit, ullumikkutut aaqqissuussaaneq itsillugu katersat 60 procentii pisortanut tunniuttariaqarpai, tassa Naalagaaffimmut imaluunniit Kalaallit Nunaata namminersorlutik oqartussanut, katersisoq kalaallit nunaanni aaqqissuussanut ilaasimappat. Katersat tamakkiisumik innuttaasumut tunniunneqarnissaat qulakkeerneqaqqaartariaqartoq, Pele Broberg nassuiaavoq.
IA: Suliffimmi utoqqaat pinngitsaalineqassanngillat
Inuit Ataqatigiit aamma aaqqissuussinermut allannguuteqartitsiniarlutik piumasaqartunut peqataapput.
Partiip sulissutiginiarpaa utoqqalinersiaqarluni sulisoq sulinermini utoqqalinersianut katersisussaatitaanera
atorunnaarsinneqassasoq.
Tassa Inatsisartunut qinersinermut 11. marts 2025-mi ingerlanneqartussamut atatillugu partiit sisamat qineqqusaarutaat misissorlugit, takuneqarsinnaavoq amerlanerussuteqarluartut aaqqissuussinerup atorunnaarsinneqarnissaanut imaluunniit aaqqissuussinermut allannguuteqartitsinissaq anguniaraat.
S: Ingerlaavartumik nalilersuineq pisariaqarpoq
Partii Siumut aaqqissuussinermut allannguuteqartitsiniarluni piumasaqaatinik suaaruteqanngilaq, kisianni partiip anguniagaani oqaatigineqarpoq aaqqissuussinermut ingerlaavartumik nakkutilliisoqartariaqartoq:
- Nunatsinni sulisartut aningaasarsiortullu tamarmik utoqqalinermi soraarnerussutisiaqalernissaat
atuuppoq. Aningaasarsiortut tamarmik utoqqalinissamut toqqorterisussaatitaalerneranni
akilersuisitsinermi periutsit aaqqissuunneqartassapput nunatsinni kattuffiit susassaqartullu allat
suleqatigalugit. Ileqqaartussaatitaanerit atuutilersinneqarsimasut nalilersortuarsinnaanissaat
Siumup pingaartippaa.
