Soraarnerussutisiaqalernissamut katersisussaatitaaneq pillugu Inatsisartunut qinersinissamut atatillugu qineqqusaarnerup nalaani sakkortuumik oqallisaanikuuvoq.
Marsip 11-ani 2025-mi Inatsisartunut qinersinerup kingorna partiit, Demokraatit, Inuit Ataqatigiit, Siumut aamma Atassut naalakkersuisooqatigiinnissamut isumaqatigiissuteqarput.
Soraarnerussutisiaqalernissamut katersisussaatitaaneq pillugu Inatsisartunut qinersinissamut atatillugu qineqqusaarnerup nalaani sakkortuumik oqallisaanikuuvoq.
Marsip 11-ani 2025-mi Inatsisartunut qinersinerup kingorna partiit, Demokraatit, Inuit Ataqatigiit, Siumut aamma Atassut naalakkersuisooqatigiinnissamut isumaqatigiissuteqarput.
Naalakkersuisooqatigiitisumaqatigiissutiminni ilannguppaat utoqqalinersiaqarneq pillugu tamakkiisumik aaqqissuusseqqinnissaq sulissutigineqassasoq, tassanilu soraarnerussutisiaqalernissamut katersisussaatitaaneq nalilersoqqinneqassasoq ilanngullugu isumaqatigiissutaavoq.
Soraarnerussutisiaqalernissamut katersisussaatitaaneq nalimmassarneqassaaq
- Soraarnerussutisiaqalernissamut katersisussaatitaanermi periutsit naapertuutinngitsut iluarsiiviginiarlugit Naalakkersuisut suliamik aallartitsereerput. Arlalitsigut ajornartorsiutitaqarpoq katersisussaatitaanerup aallartinneqarnerani siunertarineqartunut naapertuutinngitsutut nalilerneqartariaqartunik, aningaasaqarnermut akileraartarnermullu Naalakkersuisoq, Múte Bourup Egede (IA) oqarpoq nangillunilu:
- Siullermik, sulissutigaarput aaqqiissutissamik nassaarnissaq, taamaalilluni katersassanut kinguaattoortoqarsimatillugu qaffasinnerusumik akileraartitsilluni ilanngaasarneq atorunnaarsinniarneqassaaq. Tamatuma saniatigut aamma sulissutigaarput utoqqalinissaminnut katersereersut qaavatigut katersisussaatitaasarnerat atorunnaarsinniarlugu, tjenestemandspensionut katersereersut qaavatigut katersitinneqarunnaarnissaat sulissutigaarput, Múte Bourup Egede oqarpoq.
Taava imaappa, soraarnerussutiaqalernissamut katersamut akiliutit akissarsiat aqqutigalugit toqqaannartumik ilanngaatigineqartalissasut, tamaalilluni inuit namminneq illuartitsisarneq isumagiunnaarlugu?
- Maannakkut taanna akissuteqarfigisinnaanngilara, suliarmi aallartinneqaqqammerpoq.
Qaqugu aaqqiissutissat atuutilissasut naatsorsuutigaasiuk?
- Maannakkut ulluliisinnaanngilanga, siullermik inatsisissatut siunnersuut suliarissavarput, siunnersuullu naammassereerluni tusarniaassutigineqareerpat pisariaqartitsisoqartillugu iluarsaanneqassaaq, kingornalu Inatsisartunut tunniunneqassaaq tassani suliarineqassalluni. Neriuutigaara ukioq manna angumersisinnaassasugut.
Sisamassaanik allanngortinneqassaaq
Soraarnerussutiaqalernissamut katersisussaatitaaneq 1 janaur 2018-mi aallartinneqarmalli, inatsisip atuutilerneraniit pingasoriarluni allanngortinneqarnikuuvoq. Allannguutit pingaarnerusumik isertitanut tunngaviusunut iluarsiinissamik siunertaqarsimapput, pingaartumik isertitakinnerusunut tunngatillugu.
Aaqqissuussineq taanna oqallinnernik kissaammernertaqartunik pilerersitsisimagaluartoq, taamaattoq innuttaasut aaqqissuussinermut sungiussilersimasutut isikkoqarput.
Tassami aningaasaqarnermut akileraartarnermullu Naalakkersuisuusimasoq, Naaja H. Nathanielsenip (IA) decembari 2022-mi saqqummiussai naapertorlugit, inuit 7.000-it missaanniittut, aaqqissuusineq aallarteqqaarmat katersassaminnut naammattumik ileqqaarsimanngillat. Aningaasaqarnermut akileraartarnermullu Naalakkersuisoqarfiup 2022-ip naanerani nalunaarutigaa naammattumik ileqqaarsimanngitsut ikileriarsimasut 4.000-it missaannut.
Maannalu naatsorsuutigineqarsinnaavoq aaqqissuussineq allanngortinneqaqittussanngortoq, siunissamilu atorunnaarsinneqassanersoq suli nalunarpoq, aaqqissuussineq naalakkersuisooqatigiit isumaqatigiissut naapertorlugu nalilersorneqartussaammat. Kisianni aaqqissuussineq atuutiinnassappat imaluunniit atorunnaarsinneqassappat, tamanna apeqqutaatinnagu Bourup Egede naapertorlugu inatsimmi atuuttumi allannguisoqartariaqarpoq kinguarsaanertaqanngitsumik.
