KL

DK

Søren Espersen tulliani qinersisoqalerpat qinigassanngorteqqissanngilaq politikkimiillu anissalluni

DF-imi siornatigut nuimasoq ullumikkullu Danmarksdemokraterne sinnerlugu Folketingimut ilaasortaq qinigassanngorteqqissanngilaq.

Søren Espersen, Dansk Folkeparti
Ritzaus Bureau
Saqqummersinneqarpoq

Politikkikkut inuuneq 71-inik ukiulimmut Søren Espersenimut naanngitsoq.

Søren Espersenip 71-inik ukiullip politikkikkut sulinera naajartulerpoq.

Danmarksdemokraterne sinnerlugu Folketingimut ilaasortaq Espersen tulliani qinigassanngorteqqissanani Ritzaumut oqarpoq.

- Isumaqartuaannarnikuuvunga ingerlalluartilluni qaffasinnerpaamiinnermi unittoqartariaqartoq. Uanga nammineq taamaannerlunga naluara oqartuaannarnikuuvungali Christiansborgimit aneqqatussananga. Timikkut tarnikkullu peqqippunga, aamma nunarsuup ilaata takunissaa qilanaaraara. Ukiuni 30-ni avatangiisini uaniippunga, oqarpoq.

Espersen 2005-imiilli Folketingimi ilaasortaavoq. 2005-imiit 2022-mut Dansk Folkepartimi nuimavoq, siornatigullu partiimi tassani tusagassiornermut tunngatillugu pisortaasimalluni. 2022-mi DF-imit anigami Inger Støjbergip partiianut nuuppoq.

Folketingimut qinersinissaq tulleq kingusinnerpaamik oktobarip 31-ani 2026-mi pissaaq. Espersenilli ilimagaa tamanna siusinnerusukkut pissasoq. Immaqa ukiup ataatsip missaa qaangiuppat, Espersen mianersortunnguamik eqqoriaavoq.

Christiansborgimi nangaanani oqariartartutut erseqqissunik isumaliutersuuteqartarluni ilisimaneqarpoq. Ilaannikkut tamanna inuttaanut ajornartorsiutinik nassataqarsinnaasarluni. Politikkimili sulinermini peqqissimissutissaqarani Espersen oqarpoq.

Espersen maanna kulturimut oqaluffimmullu tunngasunut oqaaseqartartuuvoq. Taamaattumik siornatigutut tusagassiuutitigut saqqumilaartiginngilaq.

Siornatigut taamaappoq. Espersen ukiorpassuarni nunanut allanut politikkimut tunngasunik suliaqarsimavoq. Ilaatigut ukiuni arlalinni DF-imi nunanut allanut tunngasunut oqaaseqartartutut ukiunilu sisamani Folketingimi nunanut allanut tunngasunut ataatsimiititaliami siulittaasutut. Aamma DF-imi ukiuni arlalinni politikkikkut siulittaasup tulliatut atuuffeqarnikuuvoq.

DF-imi sivisuumik eqqissiviilliortoqareersorlu ilaasortat arlallit partiimit anisut assigalugut Espersen 2022-mi juunimi ilaasortaajunnaarpoq. Suliartornissani nuannariunnaarsimavaa Danmarksdemokraterniileramili sulerusussusaa uteqqilluni.

Nuannaarutigaluguli DF-imiinnera eqqaamavaa, ingammik 2000-ikkunni nunanit allanut tunngasunut politikkimut sunniuteqarluarsimanini. Naalakkersuisoqatigiinnut VK-mut DF taama tapertatut inissisimavoq.

- DF Danmarkimut aalajangiisutut inissisimalluinnarsimavoq, nunasisunut politikkimut tunngatillugu maannakkut aamma inissisimanitsinnut. Tamanna DF-ip suliaraa, namminerlu ukiorpassuarni partii taanna sullitingaatsiarsimavara. Europa qimerlooraangakku oqarsinnaavunga maani Danmarkimi sulilluarsimasugut, Espersen oqarpoq.

Taanna Christiansborgimi politikkeritoqqani tulliani qinersisoqarpat qinigassanngorteqqinniarnatik nalunaartut kingullersaraat.

Venstremeersoq Hans Christian Schmidt Socialdemokratiineersorlu Bjarne Laustsen qanittukkut taamatut aamma nalunaaruteqarput.

Espersenip Danmarksdemokraternesip siunissaa isumalluarfigivaa, aamma nammineq peqataanngikkaluaruni. Naalakkersuisunngornissaq anguniagaavoq.

- Folketingimi ilaasortat amerlanersaat ministerinngorsinnaalluarput sulilluarsinnaallutillu, Espersenip aqqi eqqaanagit oqarpoq.

Espersen Yvette nuliaraa tallimanillu qitornaqarlutik. Taakkua ilagaat Susie Jessen, angunni assigalugu politikkimik suliaqartoq. 2022-mi qinersisoqarmalli Danmarksdemokraterne sinnerlugu Folketingimi ilaasortaavoq.

/ritzau/

folketinget samfund danmarksdemokraterne søren espersen udland inuiaqatigiit

ATORFIIT Se alle jobs

Powered by Labrador CMS