Sorsunnerup unitsinnissaanut Ukrainemik Ruslandimillu suleqateqarnissamik Trump neriorsuivoq

Sorsunnerup unitsinnissaanut Ukrainemik Ruslandimillu suleqateqarnissamik USA-mi Republikanerit partiiannit præsidentinngorniartoq Donald Trump neriorsuivoq.

Nutaarsiassaqartitsivik Reuters naapertorlugu, tallimanngormat Ukrainep præsidentia Volodymyr Zelenskyj ataatsimeeqatigitinnagu taama oqarpoq.

Trump Towerimi New Yorkimiittumi tusagassiortunik katersorsimasunik taakku oqaloqateqarput.

Tassani Trumpip Zelenskyj nersualaarpaa, Ruslandilli præsidentia Vladimir Putin aamma attaveqarfigilluarlugu erseqqissarpaa.

- Marluulluta (Trump aamma Zelenskyj, aaqq.) attaveqarfigiilluaqaagut, soorlu aamma nalunngikkissi præsident Putin aamma attaveqarfigilluariga.

- Isumaqarpunga ajugaassagaluarutta sukkasuumik aaqqiiumaartugut, Trump, novembarip tallimaanni qinersisoqarpat USA-mi præsidentinngornissaminik neriuuteqartoq, oqarpoq.

Ukrainemi sorsunneq pillugu Xelenskyjip oqaaseqaatai naammaginngilluinnarlugit ataatsimiinneq sioqqullugu Trump oqarpoq.

Præsidentitut sorsunneq unitsipallassinnaallugu Trump arlaleriarluni oqarsimavoq.

Reuters naapertorlugu Zelenskyj atuagassiamut The New Yorker-imut oqarpoq Trumpip „sorsunnerup qanoq unitsinnissaa nalugaa“.

Trumpilli isumaqatiginngilaa, præsidentinngorniartoq sisamanngormat oqarpoq.

- Ilisarisimanngilaanga, Trump oqarpoq.

- Isumaqarluarpunga isumaqatigiissuteqarsinnaallunga (sorsunnermik unitsitsisinnaasumik, aaqq.), Trump nangilluni oqarpoq, siusinnerusukkullu arlaleriarluni oqartarsimavoq sorsunneq, 2022-mi Ukrainemik Ruslandip saassussineranik aallartittoq, præsidentitut unitsipallassinnaallugu.

Ullumimut USA-p Ukraine 4,5 milliardit koruuninik sakkutooqarnikkut ikiorsimagaa, USA-p nunanut allanut tunngasunut ministereqarfiata nittartagaani allassimavoq.

Aamma novembarip tallimaanni præsidentimut qinersisoqarnissaa sioqqullugu sakkutooqarnermut tapiissutit qanoq innissaat nalorninartorujussuuvoq. Præsidentinngorniunnermi Trumpip Demokraatineersoq Kamala Harris unammissavaa.

Sakkussianik ungasissumut ingerlasinnaasunik killermiut sanaavinik Ruslandimut atuinissamik Ukrainemi præsidentip USA-mi naalakkersuisut maannakkut atuuttut tatisimavai. Kissaat tamanna Putinimik siorasaarititsivoq.

Zelenskyjilli USA-mut tikeraarnerani sakkussianik ungasissumut atorsinnaasunik nutaanik nalunaaruteqartoqanngilaq. Ruslandimilli Ukrainep saassussinnginnerani akuersissummik taama ittumik saqqummiussisoqassanersoq aamma qularnarpoq.

/ritzau/