Spaniami sarfaaruttoqarnera pissutaalluni Tusassip atortui attaveeruttut
Spaniami qeqertami Gran Canariami attaveqaatit ataasinngormat attaveerummata Tusassip atuisui qaammataasatigut attavillit eqqugaapput.
Tusassip sakkortusaavik atugaa Gran Canariami Maspalomosimiittoq.
Assi: Tusass
Qaanaami, Ittoqqortoormiini Tasiilamilu innuttaasut ataasinngormat nal. 18.30-miit 00.36-mut oqarasuaataat, sms-imik nassiussisinnaanerat internetsisinnaanerallu ajornarsipput.
Tusassip maanna ajornartorsiut nassuiaateqarfigaa, Spaniamilu Portugalimilu ataasinngormat innaallagiaarunneq pissutaasoq paasissutissiissutigalugu.
Spaniami sarfaaruttoqartillugu Kalaallit Nunaanni attaveqaatit sunnerneqarsinnaanerat Tusassip Spaniami qeqertami Gran Canariami qaammataasamut attaveqarnermut pingaarutilimmik sakkortusaavia pissutaasarpoq:
- Attaveqarfik qaammataasamut datanik nassiussisarpoq, taannalu atuisunut Qaanaami, Ittoqqortoormiini aammalu Tasiilamiittunut attaveqartitsisuulluni. Gran Canaria silaqqissuusarmat aammalu qaammataasamut qanittuunera, tassuunalu data-nik annertuunik aallerfiusinnaanera pissutaalluni eqqarsaatigilluaqqissaakkamik atugaanissaa aalajangiunneqarsimavoq, Tusass allappoq, nangillunilu:
- Kabelit Gran Canariamut attavilersuisuusut Spaniamiit Danmarkimut aammalu USA-mut ingerlaartuupput. Spaniami innaallagiassatigut qamittooqqanerup sivisussusaa pissutaalluni Spaniap nunaani atortorissaarutit atorunnaarlutik unissimapput.
Spaniami Portugalimilu ataasinngornermi innaallagiaaruttoqarnera Iberiap qeqertaasa akornanni aatsaat taama annertutigisoq Ritzau allappoq.
Angallannerit unittoorput, mobilit internetilu attaveerupput, aqqusinermi angallannermi qaammaqqutit qamipput timmisartullu amerlasuut aallarnaveerlutik.
