Spiralilersuisimaneq pillugu qulaajaaneq suli naammassinngitsoq
Spiralilersuisimaneq pillugu qulaajaaneq qaqugu tamanut saqqummiunneqassanersoq, oqartussat suli oqaatigisinnaanngilaat.
Naalakkersuisut qallunaallu naalakkersuisui kalaallinut arnarpassuarnut ukiuni qulikkuutaani akuersititseqqaaratik spiralilersuisimanermut utoqqatserput.
Assi: Emil Stach
Spiralilersuinermi suliami qanoq pisoqarsimaneranik, arlaannaannulluunniit attuumassuteqanngitsumik qulaajaasunit nalunaarusiaq, 2025-mi septembarip aallaqqaataani naammassineqartussaagaluarpoq.
Ilisimatusarfiup nittartagaani taama allassimavoq.
Nalunaarusiarli suli tamanut saqqummiunneqanngilaq.
Danmarkimi nunamut namminermut peqqissutsimullu ministereqarfik Sermitsiap attaveqarfigaa, taakkuali qulaajaaneq qaqugu tamanut saqqummiunneqarnissaa pillugu oqaaseqarsinnaanatik ilisimatitsipput.
Peqqissutsimut Inunnut Innarluutilinnut naalakkersuisoqarfimmi nakorsatut siunnersortip nakorsaanerusimasup Henrik L. Hansenip,
inaarutaasumik pilersaarut ilisimasaqarfiginagu qanittukkulli saqqummiunneqarnissaa naatsorsuutigalugu, Sermitsiamut oqaatigaa.
Nalunaarusiaq tunniunneqarsimanersoq qaqugulu tamanut saqqummiunneqassanersoq paasiniarlugu, spiralilersuisimaneq pillugu qulaajaanermi aqutsisoq Tenna Jensen Sermitsiamit aamma attaveqarfigaarput. Allaaserisalli saqqummersinnerani taanna suli akissuteqanngilaq.
Eqqugaasut utoqqatserfigineqartut
Nalunaarusiap tamanut saqqummiunneqarnissaata paatsuungassutigineqarnerata nalaani, Naalakkersuisut qallunaallu naalakkersuisuisa kalaallit arnarpassuit ukiuni qulikkuutaani akuersitinnagit spiralilersorneqarsimaneraannut utoqqatserfigaat.
Utoqqatsernissaq qulaajaanerup naammassinissaanut utaqqisinneqassasoq ministeriuvoq Mette Frederiksenip (S) siusinnerusukkut oqaatiginikuugaluarpaa.
- Suut tamaasa paasinngikkaluarlugit naalakkersuisunut suliaq taanna assut sunniivoq, tassami kalaallit arnat amerlasuut assigiimmik oqaaseqartarput, danskit peqqinnissaqarfiannit kannguttaatsuliorfigineqarsimallutik.
- Pereersimasut allanngortissinnaanngilavut. Kisianni akisussaaffik uagut tigorusupparput. Taamaattumik Danmarki sinnerlugu ima oqarusuppunga: Utoqqatserpunga, Mette Frederiksen augustip 27-ani 2025-mi ataatsimut nalunaarummi oqarpoq.
Nalunaarusiaq arlaannaanulluunniit attuumassuteqanngitsunit suliaqartut naammassippassuk, danskit naalakkersuisui kalaallit naalakkersuisui peqatigalugit qanoq aalajangersimasumik iliuuseqarfigineqassanersoq eqqartorneqassasoq nalunaarummi aamma allassimavoq.
Arnat 143-t akuersitinneqaratik spiralilerneqarnikuunerminnut Nunamut namminermut peqqissutsimullu ministereqarfimmut taarsivigineqarnissartik 2024-mi marsimi piumasaraat.
Qulaajaaneq naammassimmat utoqqatserneq Kalaallit Nunaanni pisortatigoortumik malunnartinneqassaaq.
