KL

DK

Stine Egede kommunimut sassaqqinnissaminut piareerpoq

Kommune Kujallermi innuttaasut amerliartuinnartut kaammattuuteqareersullu borgmester Stine Egede (IA) kommunalbestyrelsemut sassaqqinnissaminut aalajangerpoq: Innuttaasut borgmesteritut nangissasunga kissaatigissappassuk, tamanna piareersimaffigivara, taanna oqarpoq.

Stine Egede 6. april 2021-mi Kommune Kujallermi qinigaanerpaavoq 410-nit taaguunneqarluni. Tamatuma saniatigut partiitut IA-p Siumut ukiorpassuarni kommunemi aqutsisuusimasoq ajorsartippaa.
Jensine Berthelsen
tusagassiortoq
Saqqummersinneqarpoq

Kommune Kujallermi borgmesteri Stine Egede (IA) piffissami sivisuumi eqqarsareerluni aalajangerpoq kommunimi qinikkatut innuttaasunik sullissinini nangikkusullugu sassaqqissalluni.

- Sivisuumik sukumiisumillu eqqarsaatigereerlugu aalajangerpunga kommunalbestyrelsimut sassaqqinniarlunga. Taamak aalajangernera annertuumik pissuteqarpoq nunaqqatitta tatiginnillutik kaammattuillutik saaffiginnittarnerat annertummat, soorunalumi aamma ilaquttama qanigisamalu tapersersuiuarnerat nukissaqartitsilluarmata, Stine Egede aalajangernerminut tunngavilersuivoq.

"Torersaanermut qinigaaffik ataaseq naammanngilaq"

Stine Egede april 2021-mi qinersinerup kingorna borgmesterinngorami pilersaaruterpassuaqarpoq kommunip ineriartortinneqarnissaa pillugu. Taamaattorli sivitsunngitsoq qaangiummat kommunip aningaasaqarnikkut, sulisussaqarnikkut, innuttaasunik kiffartuussineratigut allarpassuartigullu annertuumik torersagassaanera kiinnerfigisariaqarsimavaa:

- Qinigaaqqaaratta pilersaaruterpassuaqarpugut, tamakkumi ilai naammassivagut, kisianni nassuerutigisariaqarpara torersaanermut piffissarujussuaq atortariaqarsimavarput, maannalu qinigaaffiup naanerani oqaatigisinnaavara allaffissornikkut kommunillu aaqqissuussaaneratigut iluarsaassineq qinigaaffik ataaseq naammanngitsoq, sulimi aaqqitassaqaqaagut, innuttaasullu tamanna toqqassappassuk torersaanermi siunissamullu ilusilersuinermi siuttooqqinnissannut piareersimavunga, Stine Egede (IA) Sermitsiamut oqarpoq.

Stine Egedep ilanngullugu oqaatigaa aningaasaqarnikkut inissisimaneq pillugu kommunalbestyrelsip tupatsitaasimaneraniit qinigaaffik ataasiinnaq atorlugu aaqqiisoqarsinnaassasoq:

- Taamaattumik ukiut tullernut qulinut atuuttussami Kommune Kujallermi ineriartortitsinissamut pilersaaruteqartariaqarpugut, tamannalu aqqutigalugu kommune ingerlalluartoq angussagutsigu suliassagut ataqatigiissarluarlugit ingerlatsisariaqarpugut.

Inuussutissarsiutitigut periarfissat isumalluarnarpoq

Kommunip patajaallisarneqarnissaanut nukippassuit suli atorneqassasut ilimagigaluarlugu taamaattoq Stine Egedep isumalluarneq annertooq tunngavissaqartoq takusinnaanerarpaa:

- Kommunitsinni pissutsit ajortuinnaanngillat, tassami inuussutissarsiornikkut ukiuni aggersuni pisussat isumalluarnissatsinnik tunngavissaqartitsilluarput, Egede oqarpoq.

Tassani aamma Qaqortumi mittarfissaq inuussutissarsiornikkut inerisaanermi atorluarneqassasoq Stine Egedep neriuutiginerarpaa:

- Neriuppunga mittarfik atuutileriaruni Kommune Kujallermi inuussutissarsiortunut sutigut tamatigut iluaqutaallualerumaartoq, minnerunngitsumik takornariaqarnikkut periarfissanik siuarsaanissamut iluaqutaalluarumaartoq.

Aatsitassarsiornerup tungaatigut inerisaaneq aqqutigalugu suliffiit 500-it missaannik amerlassusillit pilersinneqarnissaat pillugu, tassani tigussaasumik Nanortallip eqqaani Killavaallu Alannguani pilersaarutigineqarneri aamma kommunip ineriartorneranut tapertaalluarumaartut neriunnerarpoq:

- Uagut, tassa kommune sinaakkutissanik pilersitseqataasussavugut, oqartussaaffilli qitiusumi ingerlanneqarpoq, ataqatigiissaarilluarnikkut aammalu kommunip sunniuteqarluarneratigut annertuumik ineriartornitsinnut tapertaassasut qularinngilara, Stine Egede (IA) Kommune Kujallermi kommunalbestyrelsimut sassaqqittoq oqarpoq.

Stine Egedellu naggataatigut erseqqissaatigaa Kommune Kujalleq nangittumik nunallerineq nersutaateqarneq savaateqarnerlu aqqutigalugit nunatsinni imminut pilersornerunissamik anguniagaqarnermut tapertaalluassasoq nangittumik sulissutigerusukkini.

Taassma ilaatigut innersuusutigaa nunalerinermik ilinniarfiup Upernaviarsummiit Narsamut nuunneqarnissaa, Kalallit Nunaanni imminut pilersornermut periusissiami nutaami, Naalakkersuisullu saqqummiuteqammigaanni pilersaarutinut ilaasoq.

inuiaqatigiit kommunemut qinersineq 2025 kommune kujalleq kommunalvalg 2025 inuit ataqatigiit stine egede borgmester

ATORFIIT Se alle jobs

Powered by Labrador CMS