Stoltenberg Ruslandimut Kinamullu: Atomi atorlugu sakkussiaatigut piareersimapput

- Nato-p atomi atorlugu sakkussiaatai aarlerisaarutaapput periarfissat allat nungunnerini atugassat.

Nato-p generalsekretæria, Jens Stoltenberg taamak oqarpoq.

Nunat Natomi ilaasortaasut illersornissamut ministeriisa ataatsimiinnissaat sioqqullugu Stoltenberg immikkuullarissumik erseqqissuliorluni nalunaaruteqarpoq, Nato piareersimasoq, atomip nukinganik sakkussiat atorsinnaanissaat piareersimaffigineqartoq.

Stoltenberg naapertorlugu nalunaarut taanna Rusland-ip aamma Kina-p atomip nukinganik sioorasaarinerisa qaffassimaneranut tunngavoq.

- Ukiuni kingullerni qaammatinilu makkunani atomip nukinganik oqallinnermik navianartorsiortitsisumik Rusland-ip tungaaniit takuarput. Ruslandip nalunaarutigaa atomip nukinga atorlugu sakkussiat Belarusimut inissinneqarsimasut aamma sungiusarnerit ingerlanneqarsimasut, Stoltenberg oqarpoq.

Taanna aamma erseqqissaavoq, Kina aamma atomip nukinganik sakkussiaatiminik annertusaasoq. Stoltenbergilu naapertorlugu Kina Rusland-imik toqqaannanngikkaluartumik tapersersuivoq taamaalillunilu Putin-ip Ukrainemi sorsunnera tapersersorlugu.

- Aamma Kina-mit atomip nukinga atorlugu sakkussiornikkut sioorasaarneqarpugut, atomip nukinganik nutarterinermik annertuumik ingerlatsineratigut.

- Taakku nunarsuarmi rakettinik ungasissumut igeriunneqarsinnaasunik pigisaqarput, nunanut Nato-mi ilaasortaasunut anngussinnaasunik. Taamaattumik ersarissumik nalunaarutigissavarput, atomip nukinga atorlugu sakkussiaatigut piareersimasut, Jens Stoltenberg oqarpoq.

Taassma erseqqissaatigaa, Ruslandip imaluunniit Kinap tungaaniit "paatsoortoqarsinnaanera" inissaqartinneqanngitsoq nunat Nato-mi ilaasortat imminnut illersortariaqalissappata - aamma pisariaqassappat atomip nukinganik sakkussianik atuinikkut.

Stoltenberg erseqqissaavoq, NATO-p atomip nukinganik sakkussianik atuisinnaanerminik piareersimatitsinera nutaajunngitsoq:

- USA-p atomip nukinga atorlugu sakkussiaatai Europami inissinneqarsimapput. Tamanna ammasumik oqaluuseraarput. Aamma ammasumik oqaluuseraarput, nunat iligiit timmisartunik atomip nukinganik qaartartunik usisinnaasut pigineqartut.

- Atomip nukinganik sakkussiat piareersimatinneqarneri ukiuni qulikkaani arlalinni atuussimavoq. Sakkussiat atomitallit atorlugit sungiusarnerit pulaarsimavakka aamma tamanna ammasumik oqaluuserisimavara. Nutaajunngilaq, Stoltenberg oqarpoq.

Ilisimatitsissutigaa suli, NATO atomip nukinga atorlugu sakkussiaatai nutarterneqartarnerat ingerlaannassasoq.

- Iligiit akornanni amerlanerusut F-16-mit F-35-mut sorsuutinut ikaarsaarput, taakkulu atomip nukinganik sakkussianik usisinnaapput, Jens Stoltenberg oqarpoq.

Taanna erseqqissaavoq, Nato tassaammat illersornissamut suleqatigiiffik taamaattumillu sorsunnissamik kissaateqanngitsoq. Kisianni Stoltenbergip oqaatigaa nunarsuarmi pissutsit pissutigalugit Natomit atomip nukinga atorlugu sakkussianik atuisinnaanermut piareersimasoqartoq erseqqissarneqarnissaa pisariaqartoq.

- Nato-p siunertarinngilaa sorsunnissaq, sorsunnissamilli pinngitsoortitsinissamik anguniagaqarluni aarlerisaarisinnaaneq aqqutit ilagaat, Stoltenberg oqarpoq.