Suliaq sivisooq: Tarnikkut katsorsaaviup illutassaata sananeqarnissaa akuerineqartoq

Pilersaarusiornermi missingersuutinik sippuerujussuarneq tarnikkut katsorsaaviup illutassaata suliarineqarnissaanik pilersaarummut kinguaattoortitsivoq, maannali ukiuni arlalinni akisuumik suliarineqareerluni akuersissutigineqarpoq, sanaartornerlu aallartissinnaanngorluni.

Tarnikkut katsorsaaviup illutassaani nutaami siniffiit 22-ussapput, ilusiliinermi atortut ikkussoriaannaassapput, kingusinnerusukkut pisariaqartitsinerit allanngussappata ilusilersugaaneranik allannguisoqarsinnaassalluni, Namminersorlutik Oqartussat tusagassiorfinnut taama nalunaaruteqarput.

2027-mi naammassineqassaaq

Aningaasaqarnermut Akileraartarnermullu Ataatsimiititaliap akuersissuteqareermat Permagreen Grønlandimik isumaqatigiissummik inaarutaasumik isumaqatiginninniarnerit aallartissapput. Sanaartornerlu 2027-p naanerani naammassinissaa naatsorsuutigineqarpoq illulu atulersinnaanngussalluni.

- Piffissami sivisuuni tarnikkut katsorsaanermi sinaakkutissat kivinneqarnissaat, taamaalillunilu tarnikkut katsorsaanermi napparsimasut sulisullu atugassaannik pitsaanerusunik pilersitsinissaq annertuumik pisariaqartinneqarsimavoq. Taamaattumik kiisami Nuummi tarnikkut katsorsaaviup illutassaanik nutaamik sananermik aallartitsisinnaalernerput nutaarsiassaavoq nuannerluinnartoq. Suliaq taanna piffissami sivisuumi ingerlasimavoq, kisiannili suliaq, tarnikkut katsorsaanerup siunissami ukiorpassuarnut qulakkeeriffigineqartoq pitsaalluinnartumik inerneqarmat nuannaarutigaarput, Peqqissutsimut Naalakkersuisoq Agathe Fontain oqarpoq.

Ambulancinut eqqussiviup nutaap aamma portøreqarfiup nutaap sananeqarnissaat ilaatinneqarput. Ambulancinut eqqussivik portøreqarfillu illumut ataatsimut kattunneqassapput, taannalu maanna nakorsianut inissiisarfiusumut atasunngorlugu, aammalu tarnikkut katsorsaaviup illutaanut nutaamut ilassutitut inissillugu sananeqassasoq ilanngullugu paasissutissiissutigineqarpoq.

Sippuinerit

Peqqinnissaqarfik tarnikkut katsorsaaviup nutaap pilersaarusiorneqarneranut atatillugu aningaasanik 8 millionit koruuninik atuivallaarsimasoq 2021-mi januaarimi paasinarsivoq, tamannalu Aningaasaqarnermut Akileraartarnermullu Ataatsimiititaliap isornartorsiorpaa.

Aningaasaliissutit suliarineqarnerisa nalaani missingersuutinik sippuineq "Peqqinnissaqarfimmi pisortat pingaarutillit taarserneqarnerat“ pissutaasoq nassuiaatigineqarpoq, tamatumalu saniatigut Peqqinnissaqarfiup aamma Ineqarnermut Attaveqaasersuutinullu Naalakkersuisoqarfiup akornanni piffissaq peqqinnissaqarfiup sanaartornermut kontoani aningaasanik immikkoortitsinissamut atorneqartoq pillugu paatsuuisoqarsimasoq.