Suliffimmi avatangiisit: Wangenheim suliffigissaanermi suliniutinik ujartuivoq
Anna Wangenheim (D) 2022-mi Inatsisartut ukiaanerani ataatsimiinneranni, sullivimmi avatangiisit
aammalu suliffimmi iluarisimaarinninneq pitsanngoriaateqarnissaanut suliniutit tigussaasut
aallaavigalugit sulinngitsoortarneq qanoq annikillisarneqarsinnaaneranut Suliffigissaaneq
pillugu siunnersuisooqatigiit oqaaseqaatiliornissaa anguniarlugu Naalakkersuisut peqqusinissaat
pillugu Inatsisartut aalajangiiffigisassaattut siunnersuutiminut Inatsisartunit ilalerneqarpoq. Mannali tikillugu oqaaseqaammik takusaqanngilaq taamaammallu Naalakkersuisut suliniutit pillugit erseqqissaanissaat ujartorpaa.
- Suliffeqarfinni avatangiisinut inatsisitigut akisussaaffik Kalaallit Nunaannut ungasittumit aqunneqarnera ajornartorsiutaavoq, tamatumalu kingunerisaanik aalajangiussat tunngavigalugit suliniutit kinguartinneqartarnerat aammalu ilimagisatut pitsanngorsaataasinnaasut kinguartinneqartarnerat aarlerinartorsiortitsipput, soorlu assersuutigalugu sulisut napparsimasarnerat sulinngitsoortarnerallu suli nunatsinni ajornartorsiutaasut, Anna Wangenheim (D) erseqqissaavoq.
Assiliisoq: Leiff Josefsen
Kalaallit Nunaanni sullivimmi avatangiisinut inatsisip allanngortinneqarnissaanut inatsisissatut siunnersuutip (Sullivimmi tarnikkut avatangiisit, isumannaatsuuneq aamma peqqinneq pillugit suliffeqarfiup suleqataanera, sulliviit naliliiffigineqartarnerinut piumasaqaatinik sukaterineq, Sullivinnik Nakkutilliisoqarfiup qisuariaateqarnissamut periarfissaanik annertusaaneq, paasissutissanik katersuineq, suliarinninneq aamma ingerlatitseqqiineq, suliffeqarfinnik isumaqatigiissuteqartarnerup ingerlasarnera, pillaatissiissutinik sakkortunerulersitsineq il.il.) Namminersorlutik Oqartussanit akuersissutigineqarnissaa pillugu Inatsisartut aalajangiiffigisassaattut siunnersuut Inatsisartunit akuersissutigineqarpoq.
Tassunga aamma tunngatillugu, Demokraatineersup Inatsisartuni ilaasortap, Anna Wangenheimip siunnersuutaa, sullivimmi avatangiisit aammalu suliffimmi iluarisimaarinninneq pitsanngoriaateqarnissaanut suliniutit tigussaasut aallaavigalugit sulinngitsoortarneq qanoq annikillisarneqarsinnaaneranut Suliffigissaaneq pillugu siunnersuisooqatigiit oqaaseqaatiliornissaa anguniarlugu Naalakkersuisut peqqusinissaat pillugu Inatsisartut aalajangiiffigisassaattut siunnersuut akuersissutigineqarluni.
Sulinngitsoortarnerit napparsimallunilu angerlarsimasarnerit suli ajornartorsiutaapput
Kisianni taamaniilli, Wangenheim naapertorlugu, suliassaqarfimmi suliniutit annertusarnissaannut siunniussat malillugit annertuunik ineriartortitsisoqarsimanngilaq, aamma suli sullivinni avatangiisit pillugit siunnersuisoqatigiinnit nalunaarusiaq takusimanngilaa. Taamaattumik §37-mik apeqquteqarluni suliniutip sumut killinnera paaserusuppaa:
- Aaliangiiffigisassatut siunnersuut taasissutigineqartoq inuiaqatigiinni pingaaruteqarluinnartutut isigigakku,
soqutigaara oqaluuserineqareernermi kingorna, suliniutip killiffissiornissaa taamatullu siunissami
suliffigissaaneq iluatsilluartoq qanoq sakkortusisamik ukkatarineqarsinnaanera.
Sermitsiamut Wangenheim oqaluttuarpoq, sulinngitsoortarnerit napparsimallunilu angerlarsimasarnerit annertussusaat isigalugu suli nunatsinni annikinngitsumik ajornartorsiutaasut, naak suliassaqarfiup iluani inatsisitigut suliarineqareerlunilu akuersissutigineqareeraluartoq, taamaattorli tigussaasunik iliuusissanik manna tikillugu ersarissuliortoqannginnera amigaataasoq:
- Aarleqqutigaara sulinermi avatangiisit pillugit inatsisitigut pitsanngorsaatissat pillugit aalajangertoqareeraluartoq aammalu uanga tigussaasumik iliuusissat pillugit oqaaseqaateqartoqarnissaanik ujartuinera utaqqisitassatut inissinneqaannartoorsinnaasut suliap qanoq ingerlanneqarnera nakkutigilluanngikkutsigu.
- Sulinermimi avatangiisut pillugit suliassaqarfik suli nunatsinnit suli oqartussaaffigineqalinngilaq. Taamaattumik aalajangiinerit Christiansborgimi pisarput aamma suliffeqarnermut ministereqarfimmit Danmarkimiittoq timitalersuisussaavoq, tassungalu atatillugu sullivinnik nakkutilliisoqarfimmik oqartussaqarfik Kalaallit Nunaanni allaffeqarpoq. Ingerlatsinerit ineriartortinneqarneranni malinnaalluarneq ajorutsigit, maani ajornartorsiutit ingerlaannassapput, Anna Wangenheim (D) Sermitsiamut oqarpoq.
