1. MAAJI
Sulinermik inuussutissarsiuteqartut nunarsuaq tamakkerlugu ullorsiornerat politikkikkut oqalugiarnernik malunnartinneqassaaq
Nuummi pilersaarutit aallartinneqassapput ullup qeqqanut NC-p eqqaani katersuulluni. Nal. 13:00 sulinermik inuussutissarsiuteqartut politikerillu katersortarfimmi katersuutissapput, tassani SIK-mi siulittaasoq, Jess G. Berthelsen oqalugiartussani siulliussaaq.
Suliffissarsiortut ulluanni kingullermi 2023-mi malunnartitsinermi ilaatigut oqaatigineqarpoq ikimmatissat akiinik qaffaanissamut akerliuneq. Taamaakkaluartoq ilisimaneqarpoq kingusinnerusukkut annikitsumik qaffaaneq pinngitsoortinneqarsinnaasimanngirsoq, tassami KNI-p isumaqatigiissutaa ukioq manna naavoq.
Assiliisoq: Leiff Josefsen
Maajip aallaqqaataa sulisartut nunarsuaq tamakkerlugu anguniakkaminnik sorsuutiginnittarnerannut ulloritinneqartarpoq. Amerlanerpaat suliffiutaat ullup affaani suliffiusarput sulisut ullormi tassani aaqqissuussinernut peqataasinnaaniassammata.
Taamaalillutik sulisartut amerlasuut ulloq taanna atortarpaat pissutsit iluarsineqartariaqartutut nalilikkatik aammalu siunissami atugassarerusutatik pillugit ersersitsisarlutik. Ulloq manna aamma taamaassaaq.
Nuummi malunnartitsinissamut pilersaarut
Ukioq manna SIK-p toqqarpaa ullormi tassani malunnartitsinissaq aallartissasoq NC-p silataani ullup qeqqanut katersuunnikkut. Ullullu ingerlanerani Nahome erinarsorluni akunniliisassasoq sulisartut kattuffiannit pilersaarutaavoq.
Nal. 13:00 SIK-mi siulittaasoq oqalugiartussat tulleriaarneranni oqalugiarluni aallarniissaaq, tulliussaaq Naalakkersuisut siulittaasuat, tamatumalu kingorna Kommuneqarfik Sermersuumi borgmesteri kiisalu Inatsisartuni partiit sinniisaat. Oqalugiartitsinerilli akornanni nersornaasiisoqartassaaq aammalu makitsisoqartassalluni.
Katersuunnermi aamma Kaffemik ingerlanneqarpoq, tamanna nal. 15:00-ip tungaanut ingerlanneqassaaq.
Qeqertarsuarmi sulisartut immikkoortortaqarfiat 70-inngortorsiorpoq
Sermitsiap nittartakkatigut nutaarsiassaqartitsivianit immikkoortortaqarfiit qanoq pilersaaruteqarnersut tipisiuilaarpugut, attaveqarfigaarpullu Qeqertarsuarmi immikkoortortaqarfia.
Immikkoortortaqarfik taamma ukioq manna ukiut 70-inngortorsiortitsinissaminik ullumikkut sulisartut ulluanni aallarniivoq.
Juulip sisamaani immikkoortortaqarfik taanna ukiut 70-it angusussaavai, tassanilu ataatsimoorussamik nalliuttorsiutigineqassaaq. Immikkoortortaqarfiup siulittaasua, Niels Wille oqaluttuarpoq.
- Ullumi ullup qeqqanut aallartilluta hotelimi kaffillerluta katersuutissaagut, tassani Nuummisut siulittaasup oqalugiaataa aamma ingerlanneqassaaq aammalu ullup ingerlanerani pinnatassanik pitsaasunik makitsisoqarumaarpoq, soorlu saattussanik karsimik eqquisoqarsinnaavoq, aammalu pinnatassanik pitsaasunik allanik suliffeqarfiit tunissuteqarnerisigut pissaqartitsivugut, Niels Wille oqaluttuarpoq.
