Suliniutit nutaat kinguaassiuutitigut atornerluisimasunut katsorsartikkusulersitsisut
Kalaallit Nunaanni Pinerluttunik Isumaginnittut kinguaassiuutitigut pinerluuteqarsimasut kajumissutsiminnik kinguaassiuutitigut katsorsarneqarsinnaanissaannut kajumissaarinerat iluatsilluarpoq.
Leiff Josefsen
Kinguaassiuutitigut atornerluinerit ikilisinneqassapput, paqumigineqarneralu unitsinneqassaaq. Taama Kalaallit Nunaanni Pinerluttunik Isumaginnittut anguniagaqarput.
Kalaallit Nunaanni Pinerluttunik Isumaginnittoqarfik tusagassiuutinut nalunaarummi ilisimatitsivoq 2022-miit 2024-mi oktobarimut pineqaatissinneqarsimasut katsorsarneqarsinnaasutut nalilerneqartut 70 procentii sinnerlugit Kalaallit Nunaanni kinguaassiuutitigut katsorsarneqarnissamut kajumilersillugit iluatsissimasoq.
ISUMAGINNITTOQARFIUP "INUSSUK" SULINIUTAAT
Kalaallit Nunaanni Pinerluttunik Isumaginnittoqarfimmit pineqaatissinneqarsimasut kinguaassiuutitigut atornerluisimasut katsorsartinnissaannik kajumissaarniarlugit suliniut (programimi sapaatip-akunneri pingasut arfineq-pingasullu ingerlaneranni eqimattanik psykologinillu oqaloqateqartoqartarpoq).
Nuummi pineqaatissinneqarsimasunut inissiisarfimmiittut kinguaassiuutitigut pinerluuteqarsimasut immikkut ittumik arfineq-pingasunik inissaqalersinneqarnissaat (Inissiat arfineq-pingasut kinguaassiuutitigut pinerluuteqarsimasut immikkut inissaqarfigissavaat, sulisullu taakkununnga immikkut suliaqarsinnaapput.
Kalaallit Nunaanni Pinerluttunik Isumaginnittoqarfik Danmarkimi kinguaassiuutitigut katsorsaariaatsinik ilisimasallit nuna tamakkerlugu attaveqaqatigiittarfiannut ilannguppoq, tassanilu ilisimasanik avitseqatigiittoqarpoq.
Kinguaassiuutitigut katsorsartinnissamik neqeroorut Kalaallit Nunaanni Isumaginninnermut Aqutsisoqarfimmit, Klinik Killiliisamit, ingerlanneqarpoq.Klinik Killiliisami kinguaassiuutitigut katsorsartinnissamik neqeroorut ilaatigut meeqqanik inuusuttunillu 18-it inorlugit ukiulinnik kinguaassiuutitigut atornerluisimasutut pineqaatissinneqarsimasunut neqeroorutaavoq, taannalu 2022-mi atuutilerpoq.
Atoqatigiinnermut tunngasunik katsorsaaneq kajumissutsimik tamanullu ammasumik neqeroorutaavoq meeqqanut kinguaassiuutitigut atornerluinerit ikilisarniarlugit. Neqeroorut Inunnik Isumaginnittoqarfimmiit Killiliisamit neqeroorutaavoq.
Katsorsaaneq soqutigineqarluartoq
2022-miit 2024-mi oktobarip aallaqqaataata tungaanut pineqaatissinneqarsimasut 32-t kinguaassiuutitigut katsorsarneqarnissamut piukkunnarsorineqarput, taakkunanngalu 23-t katsorsarneqarnissaminnut akuersisimapput katsorsarneqarlutillu.
Tamanna isumaqarpoq piukkunneqartuni 70%-ii katsorsarneqarsimasut, Kalaallit Nunaanni Pinerlussimasunut isumaginnittoqarfik allappoq.
- Suliniutit maannamut kinguneqarluarsimapput. Siullermik pingaarnertullu kinguaassiuutitigut kannguttaatsuliorfigineqarsimasut ikileriarsinnaapput, aammali pinerluuteqarsimasut sulisullu paqumigineqartuaannarsimasup oqaloqatigiissutiginissaanut maannakkut sakkussaqarlualerput.
- Pineqaatissinneqarsimasut Killilisami neqeroorutinik ilassinninnerat pineqaatissinneqartunut, sulisunut inuiaqatigiinnullu tamanut pingaaruteqarpoq, Kalaallit Nunaanni Pinerluttunik Isumaginnittoqarfimmi pisortaq Christian Høygaard oqarpoq.
Suliniut "Inussuk" Ilisimatusarfimmi nalilersorneqarpoq. Naliliinermi ilaatigut takutinneqarpoq pineqaatissinneqarsimasut inissiisarfimmiittunik allanik oqaloqateqarsinnaanerulissasut, suliniut siunertaqarluartoq suliniummillu ikiorneqarsimasut.
