Sulinngiffeqarluni Angalanermut Aningaasaateqarfik: Ilaqutariit 330-t feeriarluni angalanissamik pissarsipput
SIK-p Sulinngiffeqarluni Angalanermut Aningaasaateqarfia ilaqutariit iluatsitsisut feeriarluni angalanissaannut makitsivoq.
Makitsinermi peqataasut, saamerlermit: Sulisut sinniisaat Karl Kristian Magnussen, sulisut sinniisaat Haldora Johansen, eqqartuussisoq Kristine Olsvig aamma Feriefondip allattaa Dorthea Josefsen.
Assiliisoq: SIK-p Feriefondia
SIK-p Sulinngiffeqarluni Angalanermut Aningaasaateqarfianit ilisimatitsissutigineqarpoq qinnuteqartut 535-t akornanni 330-t makinneqarsimasut, taakkulu akiliunneqarlutik feriarnissamut periarfissaqarput. Makitsineq oktobarip 18-iani ingerlanneqarpoq, makinneqartullu SMS-ikkut ilisimatinneqareerput.
Utaqqisut allattorsimaffiannik pilersitsisoqassasoq aalajangerneqarpoq, angalanissamut toqqarneqarsimasut ilaasa periarfissaq atorumasanngimmassuk. Katillugit 20-t utaqqisutut inissinneqarput.
Makititsinermi elektroniskiusumik ingerlatsisoqarpoq, sulisullu sinniisaat marluk aamma eqqartuussisoq ataaseq najuupput, makititsinerullu eqqortumik ingerlanneqarnera taakkua qulakkeerpaat.
Uku pissarsiarineqassapput
Sulinngiffeqarluni Angalanermut Aningaasaateqarfiup angalanermut bilitsinut unnuinernullu akiliuteqassapput, angallannermut tunngasunik pissuteqartumik angerlarsimaffiup ornigassallu akornanni unnuisoqartariaqarpat. Ilaqutariit taamaallaat ataatsimoorlutik angalasinnaapput; tassa tamarmik ulloq taanna aallartariaqarput ulloq taannalu utissallutik, sulinngiffeqarluni angalanermut aningaasaateqarfik paasissutissiivoq.
SIK-mi ilaasortat kisimik makitsinermi peqataasinnaapput, qinnuteqartullu sulisitsisua aningaasaateqarfimmik tapersersuissaaq.
