Sulisartut ulluat malunnartinneqarluartoq
Sulisartut, politikerit suliffeqarfiillu sinniisaat hunnurujut sinnerlugit amerlassusillit sulisartut ulluannik malunnartitsilluarput. Ingerlaaqatigiinneq, kaffisoqatigiinneq, oqalugiarnerit, nersorinninnerit eqqugassanillu makitsinerit. Ullup malunnartinneqarneranit assilisat takukkit.
Nuummi nuiannguaqarani seqinnarippoq, sulisartut ulluannik malunnartitseqataarusullutik inuppassuit peqataapput, ingerlaaqatigiinnermi aamma katersortarfimmi inussiffiulluaqisumi.
Sermitsiaq Jess G. Berthelsen-ip SIK-mi siulittaasup oqalugiaataanik allaaserisaqarpoq, oqalugiaatip allaganngorlugu saqqummiunneqarnera sioqqullugu, taannalu oqalugiaat allaganngorlugu uani atuarsinnaavat.
Air Greenland-imut immikkut nersornaat - suliffeqarfik ingerlalluartoq
Aaqqissuisoqarfitsinnut suliaqariartornitta nalaani SIK-p Air Greenland immikkut ineriartortitsiffiusumik suliffeqarfittut ingerlalluartutut nersorpaa, "Air Greenland-imut kisimi iluaqutaanani, kisiannili Kalaallit Nunarput tamaat isigalugu ineriartorneranut iluaqutaasumik."
Jacob Nitter Sørensens-ip fb-mini saqqummiussimasaanit tigusilaarivugut, atuartartutsinnut takussutissiannguamik:
