Sulisussaaleqineq peqqutigalugu amerlassutsinik naleqqussaanerit
Qeqqata Kommunia Sisimiuni Maniitsumilu meeqqerivimmi sulisussaqarniarnikkut ajornartorsiuteqarpoq. Kommuni maannakkorpiaq meeqqerivimmi sulisunik 77-inik amigaateqarpoq, taakkunani 44-ut perorsaasutut ilinniarsimasut amigaataallutik. Ajornartorsiut iliuuseqarfiginiarlugu iliuusissatut pilersaarut akuersissutigineqarpoq.
Qeqqata Kommunia
Iliuusissatut pilersaarutip ilaatigut imaraa meeqqerivinni sulisunik amigaateqartoqartillugu meeqqat amerlassusaannik aaqqiineq.
Tamanna isumaqarpoq sulisut marluk meeraaqqat qulit inimi ataatsimi paarisinnaalissagaat, siullermik meeraaqqat aqqaneq-marluk sulisunit pingasunit isumagineqartartut. Meeqqat anginerumaat inimi ataatsimi 20-it nalinginnaasumik sulisunit pingasunit isumagineqartartut, sulisussaarunnermi meeqqat 14-it sulisuniit marlunniit paarineqartalissapput.
Ataqatigiissaarineq paarlattaasussarsiornerlu
Sulisussarunnermi iliuusissatut pilersaarut aamma paarlattaasussarsiornermik imaqarpoq. Allaffissuarmi sulisussarsiornermi ataqatigiissaarisoqassaaq, taassuma meeqqerivinniit sulisunik pissarsiortassalluni. Sulisussarsinissaq iluatsinngikkaangat angajoqqaat suleqatigineratigut meeqqat meeqqerivimmiit angerlartinneqartassapput.
Kommunalbestyrelsi isumaqatigiittoq
Qeqqata Kommuniani kommunalbestyrelsimi ilaasortat tamarmiusut siunnersuummut isumaqataapput, taamaattumillu siunnersuut akuersissutigineqarluni. Iliuusissatut pilersaarut meeqqanut sulisunullu upalungaarsimanerat qulakkeerluarniarlugu suliaavoq. Kiisalu meeqqerivinni sulinermi sulisunut atugassarititaasut pitsangorsaaviginiarlugit.
NP-p Qeqqata Kommunia nersualaaraa
Nunatsinni Perorsaasut Kattuffita Qeqqata Kommunia ajornartorsiummut aaqqiinissamik iliuuseqarnera nersualaarpaa.
- Nunatsinni Perorsaasut Kattuffiata Qeqqata Kommunia nersualaarpaa pissutsit aammalu meeqqat sulisullu illersorniarlugit maanna iliuuseqarfiginialermagit - neriuutiginarporlu kommunit sinnerisa tamanna eqqumaffigalugu iliuuseqarnialerneranik kinguneqarumaartoq, NPK-mi siulittaasoq, Arnaq Brønlund Sermitsiamut allappoq.
