Suliumajunnaartut inuppassuarnit tapersersorneqartut, Hansine Brandt Nuummiu oqarpoq

Maluginiaruk: Sisamanngormat unnuaani nalunaaqutaq ataatsip tungaanut isumaqatiginninniartut isumaqatigiinnermik kinguneqanngitsumik isumaqatigiinniarsimasut pillugit nutartigaq.

Savalimmiuni kattuffinni arlalinneersut ilaasortat sapaatit akunneri pingasut sinnerlugit suliumajunnaarput, tamannalu savalimmiormiut ulluinnarni inuunerannut sunniuteqarpoq. Pisiniarfinni nioqqutissat imaarulluinnarput, orsersortarfinni dieseli nunguppoq, meeqqeriviillu atuarfiillu arlallit matoqqapput. Suliumajunnaarneq aallartimmat inuit ulluinnarni pisariaqartitaminnik eqqanaarsarlutik pipput, piffissallu sivisunngitsup iluani naatitat nunguterput. Savalimmiuni tusagassiortup Pætur Evenssonimut taama oqaluttuarpoq.

- Savalimmiuni maannakkorpiaq uivertoqartoq oqaatigineqarsinnaavoq, oqarpoq, nangipporlu:

Nuna tamakkerlugu meeqqeriviit arlallit matoqqapput. Inuiaqatigiinni inissisimaffiit allarpassuit eqqugaapput, maannami inuppassuit suliartorsinnaanngillat meeqqatik paarsisussaqanngimmata. Aap, inuit pakatsisimapput tamannalu malugineqarsinnaavoq.

Akissarsiaqarnerulerusuttut

Isumaqatigiissuteqarniarnerup iluatsinngitsoornera pissutigalugu kattuffinnit sisamaasunit suliumajunnaarneq ataasinngornermi maajip 13-ani aallartinneqarpoq.

Isumaqatigiinniartut arlaleriarlutik naapittaraluarput isumaqatigiissinnaanngillalli, aamma naapeqqeqqammeraluarput.

- Imminnulli ungasippallaaramik isumaqatigiissinnaasimanngillat. Taamaattumik suliumajunnaarneq suli piugallassasoq naatsorsuutigineqarsinnaavoq, Pætur Evensson oqarpoq.

Ippassaq sisamanngornermi illua'tungeriit naapeqqipput, tamatumuuna Hotel Færøernemi Torshavnimiittumi. Unnuaq nalunaaqutaq ataatsip tungaanut ataatsimiipput, isumaqatigiinniarnerillu ullumi tallimanngornermi nanginneqassapput. Suli isumaqatigiinniarneq ajornakusoortoq, isumaqatigiinniarnerillu iluatsissanersut ajalusuussanersulluunniit ulloq tulliuttoq paasinarsiumaartoq, isumaqatigiinniartitsisoq Terje Sigurðsson Savalimmiuni radiomut Kringvarp Føroya-mut oqarpoq.

Kattuffiit aningaasarsianik annertuumik qaffaarusupput. Suliumajunnaartut ilagaat aalisakkanik suliffissuarni sulisut, eqqaavissuarni sulisut, lastbilinik ingerlatsisut, umiarsualivinni sulisut, quersuarni sulisut eqqiaasullu.

Nerisassanik eqqanaarsarnerup saniatigut inuit arlallit biilitik benziinamik dieselimillu orsersoreerpaat. Taamaaliorput tusaramikku orsersortarfiit nunguutsiartulersut. Savalimmiuni qeqertat kujasinnerpaartaanni, Suðuroy-mi, orsussaq suli pigineqarmat inuppassuit orsersoriartorlutik qeqertamukaasimapput. Aammattaaq inuit angallannerat tamarmi unitsinneqarpoq. Ambulancet benziinamik atorfissaqartitsilernissaminnik kisimik pissamaateqartut taxallu innaallagiatortut Savalimmiuni kisimik angallapput.

‘Paasinnittoqarpoq’

Hansine Brandt Nuummiu ukiorpassuarni Suðuroymi najugaqarpoq. Taassuma biilerpassuit qeqertamukaasut orseriartorlutik qanimut takuai.

- Biilit tulleriiaattorpassuupput, uannulli sunniuteqarnerpaaq tassaavoq nerisassat amigaataanerat. Iffiat immuillu suli pissarsiarisarpavut, kisianni paarnat, neqit naatsiiallu amigaataapput. Pisiniarfinni pisiassat nunguternerat malugineqarsinnaavoq, Hansine Brandt Savalimmiuniit oqarasuaatikkut taama oqaluttuarpoq.

Ulluinnarni ajornartorsiutaasoq alla tassaavoq eqqakkat katersorneqarneq ajornerat, taakkualu teriarsuarnut uumasunullu ajoqutaasunut allanut navianartorsiortitsipput.

- Eqqakkat sumi taamaaniipput, aqqusinermi pinngortitamilu, Hansine Brandt oqarpoq.

Savalimmiuni suliumajunnaartoqarnera siullermeerluni misiginngilaa, aatsaalli taama sivisutigisumik suliumajunnaartoqartoq aqqusaarlugu. Taamaattoqaraluartoq suliumajunnaarneq paasineqarluartoq Hansine Brandt oqarpoq.

- Inuppassuit paasivaat neriuutigalugulu oqariartuutertik tusaaniarneqassasoq, paasineqarmat sooq taamaaliornersut. Inuppassuit aamma tapersersorpaat, aammali qanoq sivisutigissanersoq eqqoriaallattaalereerlutik. Qaammatini arlalinni suli pisinnaammat, Hansine Brandt oqarpoq.