Sumiiffiit qaammataasanut attavillit attaveeruttut
Illoqarfiit nunaqarfiilu qaammataasatigut attavillit attaveqanngikkallartut Tusass ataasinngornerup unnukkuani paasissutissiivoq.
Tusassip nal. 13:00 paasissutisseeqqinnissani naatsorsuutigaa.
Assi: Tusass
Nutartigaq: Tusassip upalungaarsimasui nal. 08:57 naapereerlutik nalunaarput qaammataasatigut attavilinnut attaviit maanna aaqqissimanerat qulakkeerneqartoq. Taamaammallu upalungaarsimaneq unitsinneqarluni.
Mobilit, internetti aamma timmisartunut umiarsuarnullu attaviit ajortittut Tusass allappoq. TV-li radiolu eqqugaanngillat.
Tusassip Europami suleqatigisani ullaassaq nal. tallimanut naapinniarai pinasuartoqarneranilu upalungaarsimasut nal. arfineq-marlunut ataatsimeeqatigeqqissagai ataasinngornermi kingusissukkut paasissutissiissutigineqarpoq.
Kalaallit Nunaanni Politiit atassutaarunneq pissutigalugu politeeqarfinni arlalinni sulisunik piareersimasoqarput, innuttaasullu politiinik pisariaqartitsigunik namminneq ornigussinnaallutik. Politiit innuttaasunit saaffigineqarsinnaasunik biilinik illoqarfimmi aamma angalaartoqarput.
Ukioq manna pingajussaa
Qaammataasanik attavillit Qaanaaq, Pituffik, Ittoqqortoormiit Tasiilarlu eqqugaasuupput.
- Taakkunanilu politiit, qatserisartunut aammalu peqqissaavinnut attaveqarput, politiit Facebookimi allapput.
Qaammat ataaseq qaangiuttoq maajip 26-ani apriillu 28-ani qaammataasatigut attaveqaatit aamma ajorsipput.
Spaniami Portugalimilu sarfaaruttoqarnera pissutigalugu Spaniap qeqertaani Gran Canariami Tusassip atortui apriilimi ajorsisut nassuiaatigineqarput.
