Svendimiit allakkat

”Tupip umia tamaat ammatipparput, pissutigalugu Nuup ikersua qatsorluinnarsimasoq alakkariaannaagatsigu. Ajoraluaqaarli nuannisaarnerput tassanngaannarujussuaq kiperiasaarpoq, avammut qiviarama alla takunnginnakku inuup niaqua imaaniittoq.” Svend Petersenip ullorsiutaani, AG-p tusagassiorfianut nammineq atugassanngorlugu tunniussaani, ilaatigut allassimavoq. Oqaluttuat tamanit atuarneqarsinnaanngornissaat piffissanngortoq taanna isumaqarpoq.

Svend Petersen 95-inik ukioqarpoq, Maniitsormiuuvoq qatanngutigiinnilu qulingiluaneersuulluni.

- Piffissanngorsorigakku, ukulu oqaluttuat aviisini naqinneqarnissaat pingaartikkakku, Svend Petersen tusagassiorfimmut apuukkami oqarpoq. Aviisip naammassinissaanut ulloq sulliviummat ulapaaleruttorfimmi iserpoq. Qarasaasiama saani allassuataaleruttortunga akornuserneqarnissannik piffissaqanngivissorlunga. Apersugassatut piukkunaatilik isertoq suleqatima paasitimmanga alapernaatsuunera erngerluni ikippoq. Ilassiniarlugu nikuippunga. Svend Petersen Brugsenimeersumik puussiaateqarpoq illuanilu ajaappiaqarluni. Qungujuppaanga oqarluni tunniussassaqarluni.

Harry Potter

Ingikkatta 95-ileeqqammerluni, aalisartutut piniartutullu inuusimalluni paasitippaanga. Soqutiginningaarlunga isigaara, malugisinnaavaralu oqaasissai tusarnaarluaqqissaartariaqarlugit.

Tassani erngerlunga malugaara tusagassiortutut soqutiginaatilimmik iluatsitsilluarlunga.

Oqaluttuuppianngilaanga. Ullorsiutai pulaartullu allataat pingaarnerpaapput. Allattaaviit angisuut tungujortumik qaamasumik qalipaatillit qaqortunik sinillit, kinabogiaraq nalunngisatsitut qernertuusoq aappaluttunik teqeqqulik kiisalu pappiaqqat qaqortut plastikkimut Esseltimeersunit poornikut.

- Tamaasa atorsinnaavasi allatallu aviisissinni naqillugit, Svend Petersen oktobarip qaammataani silamut nillataartumut ingerlaqqitsigani oqarpoq.

Ingerlaannaq qupperarlugit aallartippakka Happy Potteritut Tom Riddlesip ullorsiutaanik atuartutut misigalunga. Tom Riddlep eqqaamasani tammaqqunagit ullorsiutiminut allattarpoq. Svend Petersen aamma taama iliorsimavoq, ullorsiutaalu 1988-imiit aallartipput.

Pappiaraq plastikkimik puulik tiguara qulequtaalu atuarlugu:

- Aalisartutut piniartutullu ukiorpassuarni ingerlasimaninni pisimasut ilaat: Meeqqamik annaassineq

Ingilluartiterpunga atuarlungalu aallartillunga: ”Nuup kitaani uummannamut sila alianaatsorsuugaa nuliaralu tuperiartorsimavugut. Sunaaffa sivisunngitsumik. Tupersimalluta qatsungaqaaq taamaakkarluartoq misigisimavara eqqarsaatikka aporaattutut ingerlarsortutut ilertut, nuliaralu oqarfigalugu, nuanninngilaq manna nuannarinngilara. Nuup akianut nuunniarta nalunngilaralu akuerissagaanga. Angallatitsinnut ikigatta ingerlaannaq Nuup akia toraarlugu aallarpugut. Ingerlanitsinnilu aalajangerpunga qanga Nuup eqqaamiuisa kangerlummut piniariarlutik akunniffigisarsimasaat Akunnaaq tuperiartorfiginiarlugu. Akunnaamullu tulalerluta paasivarput nunaqqatissaqarluta inussinatali. Sunaaffami ilaqutariit eqqissillutik tupermi nuannisaartut, uagullu tupertussagatta piaartumik isumaginiarlutigu, tuperpugut”.

Svend Petersenip oqaluttuaata atuarnerani imminut malugilerpunga pissanganinnik aqqaamallunga. Taassumalu allatai kipungasut paasiniarsaralugit atuarsuataarlunga. Oqaatsit allaammik tungujortumik pilikkilimmik allataapput.

Meeqqap niaqua imaani

”Tupip umia tamaat ammatipparput, pissutigalugu Nuup ikersua qatsorluinnarsimasoq alakkariaannaagatsigu. Ajoraluaqaarli nuannisaarnerput tassanngaannarujussuaq kiperiasaarpoq, avammut qiviarama alla takunnginnakku inuup niaqua imaaniittoq.

Paasilertorparalu meeraasoq tupammillu ilallugu nuliara oqarfigalugu aakanna meerannguaq imaanut nakkarsimavoq. Oqariallaataalu pissikkama. Innaarsukkut nakkarsimavoq, umiatsiagut ungasiartumiimmata imaalitsiaannaq tigusinnaanngilagut. Avammut tingisariaqarpunga atisaajarnissara pisariaqartinngilara kamippakkalu peerpakka tinngivigalugu. Inuttanngua eqqornaveersaarlugu saniatigullu puigama timaatigut tiguara nerfallallugulu sakissannut niaqua ilillugu tulaakkiartorlugu.” Atuagara ilivara, meerarlu annaanneqarmat oqiliallallunga. Qupperaaqqippunga, takuaralu oqaluttuaq alla aatsaannguummat atuakkama qulequtaanut assingusoq. Svend Petersen meeqqamik allamik aamma annaassinikuusimavoq. Una pisimasoq Akunnaami pisumit ukiualuit qaangiunnerani pivoq.

Meeqqap niaqua imaani takoriasaarsimallugu Svend Petersen allappoq. Meeraq aalarpasinngilaq, nunamiillu meterinik 50-inik ungasissusilimmiilluni. Meeraq kivilersoq nujaatigut tigoqqatullugu annaappaa. Svend Petersenip meeraq meriarsarpaa qujanartumillu meeqqap iiorarsimasani meriaatarilerlugit.

Pulaartut allattaaviat

Ullorsiutini eqqaamasat eqqarsaatillu soqutiginartorpassuit allat allaatigineqarput, tamarmilli taama pissangarnatiginatik.

Ullorsiutit angutip 95-inik ukiullip puussiaatimini kisiisa nassatarinngilai, aammali allattaaviit tungujortut pisoqalilaarnikut angisuut pajugutigai. Allataq siulleq ukiut 36-t matuma siorna, 1988-imi, pisimavoq.

Pulaartut allattaaviat. Qupperarusaalerpara:

”1986-imi juunimi illuaraq napparneqarpoq. Siullermeerutaasumik 1988-imi pisimasunik allataaviit,” quppernermi siullermi qulequtsiunneqarsimavoq. Allattaaviit angalasunit tamanit atorneqarsinnaanngorlugit Svend Petersenip illuaqqamut ilisimavai. Illuaraq Nuup kangerluani Natsilimmiippoq. Allataq siulleq nammineerluni allattaasitoqaq atorlugu allataraa:

- 1988. Apriilip 28-at. Upernalernerani. Siullermeerutaasumik maani unnuivugut miternillu 56-eraarluta. SVP.

- 14/5-88. SVP. Maanga unnuiartoqqippugut. Silageqisoq qatsunganeq. Arnarlunnut qassutinik peqarpoq. Mitit 32. Svend Petersen allattaavimmut titarnernik tallimaniit qulit tungaannut takissuseqartunik allakulavoq. Suut pisarisimanerlugit, sila qanoq innersoq, uumasoqarluarnersoq uumasukinnersorluunniit. Taanna kisimiilluni pulaartut allattaaviannut allanneq ajorpoq. Svend Petersen allattaavinnik marlunnik illuaqqamut ilisisimavoq, unnuisut misigisalikkersaarfissaannik.

AG-mi tullermi saqqummertussami taakku atuarneqarsinnaassapput.