Sygeplejemik ilinniartitaanermut amerlasuut qinnuteqartut
15-t ilinniagaqalerumallutik qinnuteqarput, septembarimilu Ilisimatysarfimmi sygeplejerskinngorniarluni erhvervskandidatitut nutaamik ilinniakkamik aallartissapput.
Ilisimatusarfik.
Assi: Leiff Josefsen
Ilisimatusarfimmi sygeplejemi erhvervskandidatinngorniarluni ukiuni sisamani ilinniakkamut nutaamut soqutiginninneq annertuvoq. Taamaalilluni ilinniartut 15-t septembarimi ilinnialerlutik aallartissapput.
Taama Kalaallit Nunaanni Peqqinnissaqarfimmi Chefsygeplejerske Ella Skifte atugassiamut Sygeplejerskenimut oqarpoq.
Manna tikillugu sygeplejerskit Danmarkimut ilinniariartortarput, tamannalu nalinginnaasumik ilinniartut marluk tikillugit ukiumut ilinniarfigisarpaat.
Ilinniarnerup nunatsinni ingerlanneqarsinnaalernera ilinnialerumasunik amerlasuunik pilerilersitsivoq.
Ilisimatusarfimmi ilinniagaq ukiunik sisamanik sivisussuseqassaaq, Danmarkimi tamanna ukiuni marlunni ingerlanneqartarpoq. Ilinniarnerup piffissamut sivisunerusumut siaarneratigut, ilinniartut piffissap affaa suliinnarsinnaapput, Ella Skifte nassuiaavoq:
- Erhvervskandidatinngorniartut agguaqatigiissillugu sapaatip akunneranut ulluni pingasuni immikkoortuminni sulisassapput, ullullu marluk atuartassallutik. Tamakkiisumik akissarsiaqartinneqarlutillu Kalaallit Nunaanni Peqqinnissaqarfimmi ilinniaqqinnermut aningaasaliissutinit tapisiaqartinneqassapput.
- Manna iliuusaavoq annertooq nunatsinni sygeplejerskinik qaffassaasussaq, Ella Skifte Sygeplejerskenimut oqarpoq.
Nutaamik ilinniarfissamut isumassarsiaq Peqqissutsimut Pinngortitamullu Institutip pisortaanit Anna Kleistimeersuuvoq. Taanna Syddansk Universitetimik, nunatsinni ilinniagaqartut qarasaasiakkut ilinniartinneqarnerannik ingerlatsisussamik suleqateqarnermik pilersitsivoq.
