Taamaammat Tuukkaq Kangerlussuarmut meqqippoq
Air Greenlandip timmisartorsua Nuummut missinnaanngikkaangami Danmarkimut nalinginnaasumik utertarpoq. Sapaatip-akunneratali siuliani Kangerlussuarmukaannarpoq. Sooq taamaaliortoqarnersoq Air Greenlandip nassuiaateqarfigaa.
Tuukkap Kangerlussuarmiinnerani januaarimi assilisat.
Assi: Sam Grønvold
Kalaallit Nunaanni pingasunngornermi apriilip 30-ani ilimaginngisamik silarlulerpoq. Illoqarfiit pingaarnersaanni mittarfissuaq atulermalli timmisartorsuaq silarlutsillugu missinnaanngikkaangami utiinnartarnera sungiupparput.
Air Greenlandilli timmisartua Tuukkaq sapaatip-akunnerata siuliani Kangerlussuarmukarpoq ilaasullu niullugit. Kangerlussuarmi mittarfimmi timmisartorsuup tikinnera ukiup aallartinneranut sanilliullugu pitsaanerusumik sullilluarneqarneruvoq.
– Kangerlussuarmukarneq aaqqissutissatut periarfissat ilaattut taaneqarsinnaavoq. Tassa Nuummut mittoqarsinnaanngikkaangat aaqqiissutissani assigiinngitsuni periarfissat ilaat. Pisunili immikkut ittuni aatsaa taanna aaqqiissutigissallugu tulluartuuvoq, Air Greenlandimi pisortaaneq Jacob Nitter Sørensen naqissusiivoq.
Ilaaffissaqartoq
Timmisartorsuup ilaasukinnerunera Kangerlussuarmukartoqaannarneranut pissutaaqataasoq pisortaaneq oqarpoq.
– Timmisartoq ulikkaaqqasuuppat taamaaliorsinnaanavianngilagut. 305-inik ilaasoqarluta mikkutta aamma Nuumminngaanniit 305-it aallartussaasuuppata angalasut tamaasa Kangerlussuarmi unnuinissaannut inissaqartissimanavianngikkaluarpagut. Aamma inuit Nuummut utimullu angallanniarlugit nunap iluani timmisartuussinerit arlallit atortariaqarsimassagaluarpavut, Jacob Nitter Sørensen oqarpoq.
– Maannakkorpiarli Jettimep Albatros-imik isumaqatigiissuteqarnerani Nuup, Kangerlussuup Københavnillu akornanni timmisartuussisarnerit ingerlaarneranni iluatsitsivugut. Taamaattumik ilaasut ikittuinnaat ingerlariaqqissinnaanngitsut ilaaffissaqalerlutik.
Missinnaanngikkaanni SFJ periarfissaasoq
Timmisartup Nuummut ataasinngornermi aallartussap taamaatiinnarnikuunera pissutigalugu taartaasumik timmisartuussisoqarnikuummat Københavnimiit pingasunngornermi apriilip 30-ani aallartussaq affaat inorlugit ilaasoqarpoq. Nuumminngaanniit aallartussat amerlasuut ataasinngornerup ullaavani aallaqataasinnaanngorlugit aamma aaqqiivigineqarsimallutik.
Kangerlussuarmi mittarfik mittarfissuartut atuunnikuuvoq, tassami inissisimaffia pissutaalluni anorlertarnera qaqutigoortuummat. Nuummi ukioq manna siusinnerusukkut silarlunnera pissutigalugu mittarfik aamma atorneqartarpoq.
Air Greenlandip timmisartuussinerit arlallit silarlunnera Nuummilu mittarfiup quasarnera pissutigalugit piffissap sivikitsup iluani iluatsinngitsoortaareersullu Københavnimiit Kangerlussuakkoorluni januaarip arfineq-aappaanni timmisartuussivoq.
Taamanili pilersaarutaasumik suliaqartoqarpoq, Kangerlussuarmut angalanerit pilersaarusiorneqaqqaarlutik. Apriililli 30-ani pilersaarutaanngitsumik Kangerlussuarmukartoqarpoq, tassami Nuummut minnissamik misiliineq iluatsinngimmat Kangerlussuarmukaannartoqarami.
