Maannakkut peqqinnissaqarfimmi sulisut isumaqatigiissummik peqalerput piffissami 1. apriilip 2024-miit 30. septembarip 2028-mut atuuttussamik.
Bioanalytikerit, ergoterapeutit, fysioterapeutit, nerisassiornermik suliaqartut kattuffiat, Kalaallit Nunaanni Ernisussiortut Kattuffiat, Peqqinnissaqarfimmi ikiortit kiisalu Kalaallit Nunaanni Peqqissaasut Kattuffiat taamaalillutik isumaqatigiissuteqarput akissarsiatik sulinermilu atukkatik pillugit.
Maannakkut peqqinnissaqarfimmi sulisut isumaqatigiissummik peqalerput piffissami 1. apriilip 2024-miit 30. septembarip 2028-mut atuuttussamik.
Bioanalytikerit, ergoterapeutit, fysioterapeutit, nerisassiornermik suliaqartut kattuffiat, Kalaallit Nunaanni Ernisussiortut Kattuffiat, Peqqinnissaqarfimmi ikiortit kiisalu Kalaallit Nunaanni Peqqissaasut Kattuffiat taamaalillutik isumaqatigiissuteqarput akissarsiatik sulinermilu atukkatik pillugit.
Kattuffiit tamarmik, Peqqissaasut Kattuffiat minillugu, isumaqatigiissummut akuersillutik taasipput, peqqissaasulli taasinerat naligiissumik 84-84-imik inerneqarpoq.
Inatsisilerituunit naliliisitsisariaqarsimapput
Peqqissaasut naligiillutik taasisimanerat, peqqissaasut kattuffiata siornatigut misiginngisaannarsimavaa.
Taamatullu pisoqarnera nalorninermik pilersitsivoq, taamaammallu inatsisit najoqqutarineqartussat ersarissarneqarnissaat pisariaqartinneqarsimavoq eqqartuussissuserisut ikiortigalugit, tassani paasineqartariaqarmat nutaamik taasisitsisoqassanersoq imaluunniit allatut iliortoqassanersoq.
Inatsisitigut naliliinerup inerneranik Sermitsiaq pissarsivoq, naliliinerlu taanna tunngavigalugu maanna isumaqatigiinniarnerit inernerat akuersissutigineqarpoq:
- Tassa pisoqarpoq, siulersuisuni siornatigut misiginikuunngisatsinnik. Taamaattumik nalornissuteqalerpugut, qanoq ingerlariaqqissanerluta, aammalu paasisariaqarsimavarput taasinermi angusat pissutigalugit nutaamik taasisitsisussanngornerluta.
- Paasisaqarnerorusulluta PK-p inatsisilerituuinut isumasioqateqarpugut qulakkeerniarlugu suliap ingerlanneqarnera eqqortumik PK-p malittarisassai naapertorlugit ingerlanneqarnissaa.
Inatsisileritooq akivoq erseqqissumik: isumaqatigiissutip inernera akuersissutigineqarpoq akuersaarlutik taasisimasut tunngavigalugit.
- Tassunga pissutaavoq, isumaqatigiissummut naaggaartut amerlanerussuteqannginnerat. Siunnersuut atorunnaarsinneqassappat, taava naaggaartut angertunut sanilliullugit amerlanerussapput- tamannalu pinngilaq. Taamaattumik siulersuisut siunnersuutigeqqaagaat, tassalu isumaqatigiissutip akuersissutigineqarnissaa, maanna piviusunngorpoq ilaasortat akornanni tapersersorneqarluni akuersissutigineqartutut naleqarluni.
Nutaamik taasisitsinissaq periarfissaqanngilaq
Peqqissaasut kattuffianni siulittaasoq, Ken Jensen Sermitsiamut erseqqissaavoq, taasisitsinerup naligiissumik inerneqarnera angusaasoq immikkut ittoq.
Taassuma ilanngullugu erseqqissaatigaa siulersuisut sulissutigigaat sulisut tamarmik, pingaartumik peqqissaasut, tusaaniarneqarlutillu isornartorsiutaat pillugit aaqqiissutissarsiortoqartoq:
- Pingaartumik matumani maluginiarparput qisuariarfigalugulu peqqissaasut aqutsisutut atorfeqartut isumaqatigiissummi akuerineqarsimanngitsut misigisimanerannut tunngasoq, taamaattumillu isumaqatigiinniaqatigigavut (Namminersorlutik Oqartussat) isornartorsiut pillugu attaveqarfigaagut. Maluginiarparput isornartorsiut illuatungerisatsinnit aamma tusaaniarneqarsimasoq, taamaattumillu aqutsisut akissarsiaasa iluarsaanneqarnerat 1. apriili 2024-miit atuutilersinneqarnissaa isumaqatigiissutigaarput, taamaalillutillu sulisut allat assigalugit iluarsiissutisisussanngorlugit.
Isumaqatigiinniarnermi angusaq pitsaasoq
Ataatsimut isigalugu Peqqissaasut Kattuffiat isumaqarpoq ilaasortat piumasaqaataat siulersuisunit naammassineqartut, taamaalillutillu 2028-ip tungaanut atuuttussamik isumaqatigiissuteqarlutik.
Apeqqutigineqarmat tamanna isumaqarnersoq, pingaartumik peqqissaasut akissarsiaasa sulinermilu atugaat pillugit eqqisseqatgigiittoqarnersoq, siulittaasoq Ken Jensen akivoq:
- Maanna ilaasortatsinnut nalunaarutigaarput isumaqatigiinniarnermi angusat akuersissutigineqartut, tassami itigartitsisut amerlanerussuteqanngimmata. Tamatuma malitsigisaanik kingunerisassai qanoq tiguneqassanersut, imaluunniit nutaamik oqallisigineqaleqqissanersut, piffissap tamanna paasinarsitissavaa. PK-p siulersuisuini malittarisassat malillugit sulinissatsinnut pituttugaavugut, aammalu inatsisitigut naliliisitsinerup kingorna paasivarpiut taasisitseqqinnissaq periarfissaanngitsoq, taava tamanna maleruarparput. Kisianni soorunami apeqqummi matumani pisariaqartitsisoqarpat ilaasortatsinnut oqaloqatiginninneq ingerlatissavarput.
Maanna peqqinnissaqarfimmi sulisut matumanilu PK-p isumaqatigiinniaqatigisaat, tassa Namminersorlutik Oqartussat, angusat pisortatigoortumik akuersissutigisussaavaat, kingornalu akigititat nutaat systemimi ilanngunneqassapput, apeqqutaavorlu qanoq pilertortigisumik tamanna aaqqinneqarsinnaanersoq. taamaattumik PK-p siulittaasua Ken Jensen ulluliisinnaanngilaq qaqugu akissarsianik atuutilerfianiit iluarsiissutit qaqugu isumagineqarumaarnersut.
Ken Jensen naggasiullugu oqarpoq, isumaqatigiissut taasissutigineqarmat 63 procentit sinnerlugit taasinermi peqataasimanerat siornatigornit pitsaanerusoq, aammalu ilaasortat peqataanerunerannut ineriartorneq pitsaasuusoq. Kisianni taasisitsinermi naligiissumik inerneqarnera immikkut ittumik misigisaanerarpaa, qaqutiguungaarmallu allaat pisinnaanngitsutut nalilerneqarsinnaagaluarluni, kisianni matumani pisimavoq. Taamaattumik siulersuisut malittarisassat iluanni taamatut pisoqarsinnaaneranik qulakkeerinninnissaq siulersuisut suliaralugu aallartereeraat oqaluttuarpoq.
