KL

DK

PELE MÙTEMUT:

 - Taavami Danmark eqqartuussivimmut tunniunniartigu

Mute, ilumooruppiuk? Taavami Danmark eqqartuussivimmut tunniunniartigu Pele Broberg (N) taamatut allappoq Naleqqameersoq Naalakkersuisut siulittaasuata Múte B. Egedep (IA) DR-ip aallakaatitassiaani Deadlinemi apersorneqarnermini Danmarki inatsisitigut inuiannik kalaallinik toqoraasimasutut unnerluutigimmagu. Ilaatigut spiralilersuinermut aamma kalaallit meerartaannik pinngitsaaliissummik arsaarinnissuteqarnermut tunngatillugu Mùte B. Egede oqarpoq naalagaaffeqatigiinnermut naammagittarunnaarluni.

Tôrtia Reimer-Johansen
Journalist
Offentliggjort

Naleraq iliuuseqaqqusivoq. 

Danmark Naalagaaffia nalorninanngitsumik inatsitigut inuiatsinnik toqoraasimanerarlugu, Naalakkersuisut Siulittaasuat Muté B. Egede (IA) DR-ip aallakaatitassiaanut Deadlinemut oqaaseqareersorlu Naleqqap siulittaasua, Pele Broberg tusagassiuutitigut nalunaaruteqarluni iliuuseqaqqusivoq:

-  Mùte, oqaatigisatit oqaasiinnaanngippata iliuuseqartussaatitaavugut. Nunarput sinnerlugu Danmark eqqartuussivimmut piaartumik tunniuttussaatitaavarput, Pele Broberg oqarpoq nangillunilu:

Naalakkersuisut siulittaasuat Múte B. Egedep Deadlinemi apersorneqarnermini oqaatigaa Danmarki nalorninanngitsumik inatsitigut inuiatsinnik toqoraasimasoq.

Tassunga Naleraq isumaqataanerarpoq, eqqartuussivimmullu suliassanngortinnissaanut Naalakkersuisoqatigiiusuni amerlanerussuteqarsinnaanngikkaanni, Naleraq amerlanerussuteqartitsinissamut piareersimanerarpoq.

- Taamaammat inatsisitigut Inuiannik toqoraasimanermik ilisimannikkaanni aamma piaarnerpaamik iliuuseqarfigissallugu pisussaaffeqartoqarpoq, Pele Broberg allappoq nangillunilu:

- Taamaammat: Naalagaaffik Danmark akisussaasuilu Nunat tamalaat eqqartuussiviinut tunniunniarlik. Nunatsinni oqartussat sinnerlugit Naalagaaffik Danmark akisussaasuilu Nunat tamalaat eqqartuussiviinut suliassanngortinnissaanut Naalakkersuisoqatigiiusuni amerlanerussuteqarsinnaanngikkaanni, Naleraq amerlanerussuteqartitsinissamut piareersimavoq. 

- Oqaatsit taamak sakkortutigisut ilumut qineqqusaarutaannaasimanngippata, piaartumik iliuuseqartussaatitaavugut, Pele Broberg naggasiilluni allappoq.

Naalakkersuisut siulittaasuat, Mùte B. Egede akissuteqartinniarlugu Sermitsiaq sulissuteqarpoq.

pele broberg naleraq danmark inuiaqatigiit mùte b. egede naalakkersuisut samfund

ATORFIIT Se alle jobs

Powered by Labrador CMS