Takornarialerinermi suliaminut pimoorussisoq toqusoq
Suliaminut pimoorussisoq, inuiaqatigiinni akuliusimalluartoq uummatigissorlu. Innovation South Greenland ukiuni arlalinni suleqamminnik Sarah Woodallimik eqqaaniaavoq.
Sarah Woodall eqqaamaneqarnermisut. Qungutsarilluinnarlunilu inuummarissoq.
Assi: Innovation South Greenland
- Sarah Woodall Amerika Kujallermi inunngorpoq USA-milu peroriartorsimalluni, kalaaliusutulli misigisimasuusimavoq. Kalaallisut oqaatsivut kulturerpullu ilikkarsimavai, kalaalimininngersuusimallunilu. Kujataa, nuna, oqaluttuarisaanerput maanilu inuit itisuumik misigissuseqarfigisimavai.
Innovation South Greenlandimeersut (ISG) Sarah Woodallimut sivikitsumik napparsimareerluni toqusumut eqqaaniutaat taama aallaqqaasiuteqarpoq.
Sarah Woodall Innovation South Greenlandip Kujataani takornariartitsinikkut ineriartortitsinerani qitiusimavoq. Inuusimavoq iliuuseqarusuttuartoq, suliaminik ilisimasaqarluartoq suliassanullu maniguuttuarsimasoq. ISG taama allappoq.
- Takornarialernermut tunngasunik sulianik annertuunik aallartitsisarsimavoq, Kujataani takornarialerinerup qaffatsinneqarneruneranik kinguneqartunik. Suliani upperigaangamiuk akisussaaffimmik tigusinissaminut tunuarsimaartuusarsimanngilaq.
- Sarahp ilisarnaatasa ilagisimavaat ilaminik qaffatsitserusuttarsimanera. Kujataani takornarialerisut innuttaasullu allat pitsaasunik isumassarsiallit piginnaasanik qaffassarneqarnissaat sammisarilluarsimavaa. Ilaatigut wilderness first responder, apummik sisoortoqarnissaanut sillimaniarneq, savallu meqqui atorlugit pikkorissaanerit iluatsilluartumik aaqqissornikuusimavai. Ilitsersuisartunik pikkorissaanerit, nukinnik nutaanik pilersitsiviusimasut tapersorsorlugillu aaqqissorsimavaattaaq.
Sarah Woodall 38-nik ukioqarluni toquvoq.
