Takornariaqarnermi suliniutit aningaasaliiffigineqartut

Ukiorpassuarni nunatsinni pinngortitami sumiiffiit immikkuullarissut ornigarluarneqarsimanermik kinguneranik aserfallassimaqaat. Sumiiffiit arlallit takujuminarsarniarlugit allagartalersuisoqaranilu atortulersuisoqarsimanngilaq.

Kommunit taakkualu ineriartortitsinermik suliaqartartui qinnuteqarneratigut attaveqaasersuutinut minnerusunut aningaasaliissutaasimasunit tapiissutinik Naalakkersuisut tunniussipput. Aningaasaliissutit takornarialerinerup iluani sullissinerup pitsaanerulersinnissaanut atorneqartussat 3,8 milliuunit koruuniusut Naalakkersuisut tusagassiorfinnut nalunaaruteqarlutik ilisimatitsipput.

Iliuuseqarfigineqassapput

Ilaatigut Qassiarsummi innarluutillit perusuersartarfinnik atuisinnaalernissaannut, pisuffissanik sanaartornissamut, Kapisillit nalaanni isikkivissiornissamut ikaartarfinnullu, Ilulissani ikaartarfinnut, Upernavimmi Siorapalunnilu illoqarfimmi allagartalersuinissamut aningaasaliisoqarsimavoq.

Suliniutit maanna aasallu ingerlanerani aallartisarneqarsinnaapput, ukiullu naanerani naammassereersimassallutik.

- Sumiiffinni ataasiakkaani pinngortitap avatangiisillu illersornissaannut attaveqaasersuutinut minnerusunut aningaasaliissutaasimasunik agguaasinnaagatta nuannaarutigeqaarput. 

- Pinngortitami pingaartitatta qulakkeerneqarnissaat siunissamilu illersorneqarnissaat pingaaruteqarpoq. Aningaasaliissutaasut takornariaqarnerup iluani piujuartitsinermut iluaqutaapput, kiisalu sumiiffinni sanasunut pilersuisunullu, pineqartunik suliaqartussaasunut tapersersuinerullutik, Naalakkersuisoq Naaja H. Nathanielsen, ima oqaaseqarpoq.

2027-p tungaanut kommunit taakkualu ineriartortitsinermik suliaqartartui ukiumut attaveqaasersuutinut minnerusunut aningaasaliiffigitinnissamut Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmut qinnuteqarsinnaapput. Qinnuteqaatit upernaakkut nassiunneqartassapput.