Takornariartitsineq eqqarsaatigilluarlugu ineriartortinneqassaaq
"KALAALLIT NUNAAT …suullu tamaasa ataatsimoorfigisagut ". Taama Visit Greenlandip ukiunut tullernut qulinut periusissiaa nipeqarpoq. Periusissiami suliffeqarfiup 2035-p tungaanut pingaarnersiutai suliniutissallu sinnaakkuserneqarput.
Periusissiamik "KALAALLIT NUNAAT …suullu tamaasa ataatsimoorfigisagut" saqqummiinikkut Visit Greenlandip maanna 2035-p tungaanut takornariartitsineq siunnerfilerpaa. Periusissiaq siunnerfinnik erseqqissunik pingasunik takornariartitsinerup inuuniarnikkut, aningaasaqarnikkut avatangiisitigullu piujuartitsisumik ineriartornissaa isumannaarneqarpoq.
Periusissiaq taamaalilluni takornariartitsinerup ataatsimoorullugu pilersinneqarnissaanut siunnerfiliivoq. Innuttaasut piginnittuunermik akisussaaqataanermillu misigissapput. Takornariartitsineq aamma ineriartoqatissarissavarput – taamaalilluni inuit nunatsinni najugaqartut avaqqunnagit, Visit Greenlandip 2035-p tungaanut siunnerfia siulleq taama nipeqarpoq.
Tulliullugu takornariartitsinerup nalitusiartortitsinera aallunneqarpoq. Tikerartut amerlassusaat kisiat aallunneqassanngilaq, aammali takornariat maaniinnerata pitsaassusaa aallunneqassaaq. Siunnerfiit aappaanni takornariat nunatsinnut tamanut – nuna ukiorlu tamakkerlugu – iluaqutaanissaannik piffinnilu inuussutissarsiortunik, suliffeqarfinnik misigisanillu nukittorsaanissaat pineqarpoq.
Siunnersiit pingajuat takornariartitsinerup nunatsinni pisuussutit annersaannik, soorlu pinngortitaq, kulturi ataatsimoornerlu oqimaaqatigiiffigalugit ineriartornissaa pineqarpoq.
– Kalaallit Nunaat ukiuni makkunani nunarsuarmik sammineqariartorpoq, mittarfiit nutaat avataanillu angalasunit soqutigineqariartorneq. Tamanna nunatsinnut annertuumik periarfissiivpq – aammali akisussaaffiliilluni.
- Periusissiakkut tassuunakkut Visit Greenlandi periarfissanik eqqarsarluarluni tigusinissamik, takornariartitsinerullu innuttaasunut, tikeraatsinnullu nuannaarutaasumik ineriartornissaanut periusissiaq una siunnerfiliivoq, Visit Greenlandimi siulersuisut siulittaasuat Anette Lings oqarpoq.
Visit Greenlandip 202320235 periusissiaa "KALAALLIT NUNAAT …suullu tamaasa ataatsimoorfigisagut” uani atuarneqarsinnaavoq
