KUJATAANIT
Takornariartitsisartut Eliap nersornaasiuttagaanik nersornaaserneqarput
Innovation South Greenlandip ukioq manna Eliap Nersornaasiuttagaanik tigusisussaq toqqarpaa. Nersornaaserneqartoq tassaavoq Tasermiut Camp, ukiortaamiit Local Greenlandimik taaguuteqalersoq. Inuussutissarsiortut Freddy Christensen aamma Salik Parbst Frederiksen suliffeqarfimmik ingerlatsisuupput.
Tasermiut Camp sulilluarnerminni innuttaasunut Innovation South Greenlandillu siulersuisuinut
immikkut maluginiarneqarsimapput. Suliffeqarfik nunaqavissunik taamaallaat sulisoqartarpoq ilaatigullu
“nunaqavissuniit nunaqavissuuneruneq” aallaavigalugu suliniartarneq ingerlanneqartarluni, taassumallu
saniatigut suliffeqarfiup piujuartitsineq pingaarutilittut inissisimatissallugu pingaartippaa, Eliap nersornaasiuttagaanik nersornaasiinermut atatillugu Innovation South Greenlandimit oqaatigineqarpoq.
Suliffeqarfimmik pilersitsisut marluk immikkut ittumik periusissiorsimapput, tamannalu nunap
immikkoortuani takornariaqarnermik siuarsaaginnarani, aammali piujuartitsinermik nunallu
immikkoortuani aningaasaqarnikkut siuarsaaqqataanermik taaneqarsinnaapput.
- Nersornaaserneqarnitsinnut tulluusimaaqaagut. Nersornaaserneqarnissaq anguniarlugu
sulinngikkaluarluta suliatta maluginiarneqarsimanera uagutsinnut tulluusimaartitsivoq.
Suleqatigisartakkagut qujaffigerusuppagut – ilissi ikiuisimanngitsuugussi maanga
killittoqarsimanavianngikkaluarpoq. Soorunami aamma sulisuvut tunniusimalluinnartut, ukiut tamaasa
uagut pilluta suliaminnik nuannersunik suliaqartartut, qujaffigerusuppagut, Tasermiut Campimi pisortaq
Freddy Christensen oqarpoq.
Tasermiut Camp Local Greenland-inngorpoq
Tasermiut Camp 2018-imi aallartippoq, tassanilu aallartissutaasimallutik toqqit pingasut – massakkullu
umiatsianik marlunnik aningaasaliinerminni ilaatigut annertusisaasimallutik.
Ukiortaamiit suliffeqarfiup aqqa allanngortinneqarpoq Local Greenlandimik taaguutilimmik, suliamik
piumaneqarnerulernissaat siunertaralugu, aamma Kujataani najukkami misigisassarsiornermik
neqerooruteqarnissamik anguniagaqarnini annertusarniarlugu.
- Tatiginartuuneq uagutsinnut pingaaruteqarluinnarpoq. Pulaartutta suliavut nalilersortartussaavaat.
Allanit ajunngitsumik oqaatigineqaraangatta tatiginartuuneq annertusisarpoq. Taamaattumik
pingaartipparput suliniutitta sullitatsinnit iluarineqarnissaa, Freddy Christensen oqarpoq.
Eliap nersornaasiuttagaa ukiut tamaasa suliffeqarfimmut inummulluunniit inuussutissarsiornermi
immikkut ittumik pilersitsisinnaanermut, nutaaliorsinnaanermut tunniusimanermullu ersiutaasumut
tunniunneqartarpoq.
Qaqortumi kommunalbestyrelsip ataatsimiittarfiani Tasermiut Camp, Innovation South Greenland
aamma borgmester Stine Egede peqatigalugit nersornaat tunniunneqarpoq.
