ULLORMI PISUT
Takunnissimasunik ujartuisoqartoq – Nuup ilaata eqqaani aallaasersortoqartoq
Politiit ulloq unnuarlu kingulleq pisunut assigiinngitsunut orniguttarsimapput.
Assi: Oscar Scott Carl
Kalaallit Nunaanni Politiit Nuummi saassussinermut takunnittunik ujartuipput, politiit pigaartuisa pisortaat Poul Kreutzmann oqarpoq.
Angut anaalerummik allamilluunniit unatarneqarluni saassunneqarsimasoq Politiit pingasunngornerup unnuaani nalunaarfigineqarput.
Politiit saassunneqartoq, angut 20-nik ukiulik, ajoqusersimasunut nakorsiartarfimmi naapippaat, sulili pasisaqanngillat.
Angut inuusuttoq Svend Jungep Aqqutaani nalunaaqutaq 02.40 aamma 03.00 akornanni saassunneqarpoq, pisorlu pillugu ilisimasaqartoqarpat politiit 70 14 48-mut attaveqarfigineqarsinnaapput.
Qinngorpumi aallaasersortoqartoq
Nuummi illoqarfiup immikkoortuata Qinngorput eqqaani, „Nunarsuup naaneranik“ taaneqartumi, aallaasersortoqarsimasoq Politiit marlunngormat unnukkut qulingiluanut nalunaarfigineqarput.
Politiit ornigutsinneqarput, pisumullu atatillugu illoqarfiup iluani aallaammik aallaaneq inerteqqutaasoq pigaartut naalagaat erseqqissaavoq.
- Minnerpaamik 500 meterisut ungasitsigisumiittariaqarpoq, „nunarsuullu naanera“ taama ungasitsiginngilaq, pigaartut naalagaat oqarpoq.
Ajunaalernermi ikumatitamik ikitsisoqarmat orniguttoqartoq
Sisimiuni Palasip Qaqqaata eqqaani ajunaalernermi ikumatitamik ikitsisoqartoq Politiit aamma pingasunngornerup unnuaani nal. 02.39 nalunaarfigineqarput.
Ujaasisoqalerpoq, kisiannili angusaqarfiunani, pigaartut naalagaat oqaluttuarpoq.
Taakku ajornartorsiornermut nalunaaqutaasut allat isumaqarsinnaammata tamanna pissutigalugu inuit qaqqamut qaammaqqutinik sakkortuunik nassataqaqqunagit pigaartut naalagaat kajumissaarivoq.
Cigarettit imigassallu aalakoornartullit tillinneqartut
Sisimiuni marlunngornermi ullaakkut tallimat arferullu akornanni umiarsualivimmi quersuarmut aamma tillinniartoqarsimavoq.
Tillinniat pingasut quersuarmut iserlutik cigarettinik, imigassanik aalakoornartulinnik allanillu tillissimapput.
- Pasisaasoqannginnera pissutigalugu pisumut tunngatillugu ilisimasallit Sisimiuni politiinut saaffiginneqqullugit kajumissaarneqarput, Poul Kreutzmann oqarpoq.
