KL

DK

INUIT INNARLUUTILLIT OQAASEQARTARTUAT

Tamanit atorneqarsinnaasut aningaasaliiffigisigit

Innuttaasut 20 procentii innarluuteqarput suliffeqarsinnaanerlu pisinnaatitaaffigalugu. - Innarluutit eqqartorsinnaasariaqarpagut, suliffinnillu tamanut inissaqartitsisunik illunillu tamanut iluaqutaasunik pilersitsilluta, inuit innarluutillit illersuisuat oqarpoq

20 procent af befolkningen har et handicap og har ret til et arbejde og beskæftigelse, men der mangler viden og investeringer i universel design, mener handicaptalsmanden.
Oline Inuusuttoq Olsen
Offentliggjort

Sulinissamut suliffittaarnissamullu pisinnaatitaaffik inuit innarluutillit illersuisuat Anja Hynne Nielsen aamma inunnut innarluutilinnut siunnersorti Jacob Nossell Sulisitsisunut saqqummiussimmata sammineqarpoq.

Inuit innarluutillit pisinnaatitaaffii pillugit ilisimasat suli amigaataasut, aammattaaq inuit tamarmik atorsinnaasaannik ilusilersuinermut aningaasaliisoqartariaqartoq Inuit innarluutillit illersuisuat isumaqarpoq.

PISARTAGAQARTUNUT

Allaaserisaq una Nutaarsiassaqartitsivimmi aviisit naqitat ilaanni allaaserisaavoq.

Allaaserisat pisartagaqartunit siunissami taamaallaat atuarneqarsinnaajumaassapput.

Atuarluarna.

 Taamaaliornikkut illut ilusilersornerat inunnit tamanit atorneqarsinnaasoq pilersinneqassammat, taamaalillunilu inuit innarluutillit sulisinnaanermik pisinnaatitaaffiat qulakkeerneqarluni.

- Innuttaasut 20 procentii innarluuteqarput innarluuteqalertarpulluunniit. Inuit innarluutillit pisinnaatitaaffiisa, ilaatigut sulisinnaatitaaffiisa, qulakkeerneqarnissaat tamatta akisussaaffigigipput ilisimassallugu pingaaruteqarpoq, Anja Hynne Nielsen oqarpoq.

Inuit innarluutillit sulisinnaatitaanerat inuiaqatigiinni oqallisigineqarnissaa soqutigineqartariaqartoq isumaqarpoq.

- Isumalluutit ullumikkut atorluanngisavut pillugit tamatta kivitseqataaffiginissaat soqutigilertariaqarparput. Isumaqatigiissummut tunngatillugu, aammali inuit innarluutillit nammineersinnaanngortinniarlugit. Aamma nunatut ataqatigiilluta nukittuujorusuppugut namminiilivittunngorluta. 

-Taamaaliorsinnaavugullu aatsaat 20 procentit kingulliit peqataatikkutsigit, inuit innarluutillit illersuisuat oqarpoq. Inuit innarluutillit suliffillit naleqarnerulersitsisarnerat Canadami Danmarkimilu misilittakkat takutikkaat ilanngullugu tikkuarpaa.

-Nunanit allanit, soorlu Nunavummit Danmarkimillu, ilisimaneqarpoq inuit suliffeqanngitsut, allaat inuit tapersersorneqartariallit, nalunaaquttap akunnialuini sulisittaraanni arlalitsigut imminut akilersinnaasoq. Aningaasatigut aamma inuunerup naleqartinneratigut, Anja Hynne Nielsen oqarpoq.

4 millionit koruunit

Inuit innarluutillit oqaaseqartartoqarfiat Tilioq naatsorsueqqissaarsimavoq. Siusinaartumik soraarnerussutisialik inuuneq naallugu pisortanit 4 millionit koruunit naliginik aningaasartuuteqarfiusartutut naatsorsorsimavaat. 

Taakku sulilersinneqarpata, pisortat akileraarutitigut isertitaqarnerussapput siusinaartumillu soraarnerussutisialinnut aningaasartuutit sipaarlugit.

- Inuuneq naallugu siusinaartumik soraarnerussutisiaqarneq 4 millionit koruuninik naleqartarpoq, inulli innarluutilik sulilersinneqarpat akileraarutitigut isertitaqarfiussaaq pisortallu aningaasartuutaannik sipaaruteqarfigineqassalluni. 

-Aamma inuit innarluutillit sulisinnaatitaanerat piviusunngortinneqassaaq, inuunertillu naleqarnerusutut misigalugu nuannaarnerulissallutik. Aamma siunertaqarluartumik suliffeqaraanni peqqinnerusumik inuuneqalertoqartarpoq. Taamaaliorneq kisinneqarsinnaasuniit naleqarneruvoq, Anja Hynne Nielsen oqarpoq.

Erseqqissarpaali inuit innarluutillit sulilernissaannut aningaasaliinerit taakkua siusinaarluni soraarnerussutisiaqartunngornissamik ikiorsiissutinik qinnuteqarsinnaanerannik ajornakusoornerulersitsissanngitsut.

- Inuit innarluutillit siusinaartumik soraarnerussutisiaqalernissartik ajornakusoornerulersissanngilaat, pisariaqartitsisoqarmat. Inuit innarluutillit namminneq kissaateqarsinnaatitaapput. Taamaattumik pingaaruteqarpoq artikel 18-ip eqqaamanissaa, tassa namminneq aalajangiisinnaatitaaneq. Periarfissat assigiinngitsut pisariaqarput, inunnullu tamanut assigiimmik aaqqiissuteqartoqassanngilaq inuit assigiinngitsuummata.

Iliuusissanik pilersaarusiorneq aningaasaliinerlu

Naalakkersuisut innarluutillit pillugit isumaqatigiissutip malinneqarnissaanut iliuusissatut pilersaarusiortariaqarput, suliniutinullu aningaasaliisoqassasoq inuit innarluutillit illersuisuata neriuutigaa.

- Neriuutigaara iliuusissatut aningaasaliissuteqarnermik kinguneqartussamik pilersaarusiortoqassasoq. Allannguinermik pilersitsisumik suliamillu kivitsisumik, Anja Hynne Nielsen oqarpoq. 

Inuit innarluutillit pillugit ilisimasakinneq aamma tamanik iserfigineqarsinnaasunik illuliortoqartannginnera akornutaasut annersarigaat taanna isumaqarpoq.

- Inuiaqatigiinnut tamanut naleqqussaasoqarluni kikkunnut tamanut tulluarsakkanik ilusilersuisoqartalissasoq takorloorsinnaavara kaammattuutigerusullugulu. 

-Inuppassuit innarluuteqarput, sumiiffiillu ilaanni sulisut innarluuteqarnertik isertorpaat. Tamassuma eqqartornissaanik sapiissuseqartariaqarpugut, suliffiillu illullu tamanik inissaqartitsisut iluaqutaasut pilersittariaqarpavut, Anja Hynne Nielsen oqarpoq.

inuiaqatigiit samfund

ATORFIIT Se alle jobs

Powered by Labrador CMS