Tarnikkut atugarissaarnissamik suliniuteqarneq nuna tamakkerlugu sullissiviup nutaap pitsaanerulersissavaa
Inuusuttut atungarliortorpassuupput imminullu toqussimasut amerlavallaarlutik. Taammaammat siunnersorneqarsinnaaneq katsorsarneqarsinnaanerlu ajornannginnerulerput.
Innuttaasut tarnimikkut nanertuuteqarlutik imminullu toqunnissamik eqqarsaateqarlutik saaffiginnittut amerleriarujussuarsimasut Tusaanngamit paasissutissat takutippaat.
Assi: Leiff Josefsen
Nuna Tamakkerlugu Tarnikkut Piginnaanngorsaavik Siunnersuisarfillu Inulerivik oktobarip aallaqqaataani ammarpoq.
Meeqqanut, inuusuttunut ilaqutariinnullu naalakkersuisoqarfik tusagassiuutitigut nalunaarummi allappoq.
Inuusuttut tarnikkut atugarliortorpassuupput imminullu toqussimasut suli amerlapput. Innuttaasut tarnikkut ajornartorsiutillit imminullu toqunnissamik eqqarsaateqarlutik saaffiginnittut amerlassusaat qaffariangaatsiarsimasut, Tusaanngamit kisitsisit takutippaat.
Taamaattumik siunnersorneqarnissamik pitsaanerusumik periarfissaq pisariaqartinneqartoq, naalakkersuisoqarfik allappoq.
- Ajornartorsiummik paasinniinnarsinnaanngitsugut kisitsisit ersarissumik takutitsipput. Alloriarneq tulleq massakkut tigussavarput kikkullu tamarmik ikiorneqarnissamik pisariaqartitsisut ikiornissaannik qulakkeerinnilluta. Ataqatigiissakkamik angujuminartumillu suliniuteqarnikkut pingaarutilimmik alloriassaagut.
- Ullumikkummi angusarput annertoqaaq. Innuttaasut kikkulluunniit, sumi najugaqarneq apeqqutaatinnagu, ikiorneqarnissaminnut neqeroorfigineqarsinnaalermata, meeqqanut, inuusuttunut ilaqutariinnullu naalakkersuisoq Mads Pedersen (IA) oqarpoq.
Immikkoortortaqarfiit sumiiffinni assigiinngitsuni aamma onlinekkut katsorsaasinnaaneq
Naalakkersuisut siuliisa Nuna tamakkerlugu Tarnikkut Piginnaanngorsaavimmik Siunnersuisarfimmillu pilersitsinissaq pillugu sulissuteqarnissartik aallartinniarlugu siorna augustimi aalajangerpaat. Tamatuminnga suliaqarnerup Inulerivik inernerivaa.
Nuna tamakkerlugu suliniutit Inulerivimmi ataatsimoortinneqalerlutillu pitsaanerulersinneqassapput, taamaalilluni innuttaasut, ukioq sumilu najugaqarneq apeqqutaatinnagu, ikiorneqarnissamik pisariaqartitsilerunik ajornannginnerusumik ikiorneqartassallutik.
Inulerivik Nuummi, Ilulissani, Aasianni, Sisimiuni Qaqortumilu sumiiffinni immikkoortortaqalerluni pilersinneqassaaq. Inulerivimmi aammattaaq qarasaasiaq atorlugu siunnersuineq katsorsaanerlu neqeroorutigineqassaaq, taamaalilluni innuttaasut illoqarfiit taaneqartut avataanni najugallit sulianik ilisimasalinnik attaveqarsinnaallutillu ikiorneqarnissaq pisariaqartoq pisinnaalissavaat.
