Eqqartuussineq annertooq Eqqartuussisoqarfik Sermersuumi suliarineqartoq sulianit allarpassuarnit pisariuneruvoq.
Eqqartuussineq annertooq Eqqartuussisoqarfik Sermersuumi suliarineqartoq sulianit allarpassuarnit pisariuneruvoq.
Inuit S-imik aamma N-imik taasavut ikiaroornartulerisimasutut unnerluutigineqarput. Aappaa N aamma tarnikkut naalliutitsisimasutut sioorasaarisimasutullu unnerluutigineqarpoq. Kingulliit taakka marlunngornermi sammineqarput.
N-ip aapparisimasaa qanoq inooqatigiissimanertik eqqartuussivimmi oqaluttuaraa. Pasillerneq, mitaatiginninneq sioorasaarinerit ilaqutaanut ilanngullugit pisarsimapput. Pisarsimasut "crazy"-pput, oqaluttuarpoq.
TARNIKKUT NAKUUSERNEQ PINERLUTTULERINERMI INATSIMMI
§ 88 a.: Inuk inoqutigiinni allap akuuffigisaani ilaasoq qanittumilluunniit attuumassuteqartoq imaluunniit siusinnerusukkut inoqutigiinnut taakkununnga taamatut attuumassuteqarsimasoq, aamma piffissap ingerlanerani uteqqiattumik, allamut pineqartumut assuarnartumik aqutsissutitut naleqquttunik, ingasattumik nikassaanermik, ajortumik pinninnermik imaluunniit kannguttaatsuliornermik pissusilersortoq, matumani naqisimanninnikkut, pinngitsaaliinikkut imaluunniit nakuusernikkut nammineq inuuneqarnissamut siunissarlu pillugu nammineq aalajangiisinnaanissamut killilersuineq ilanngullugit, tarnikkut nakuusersimasutut eqqartuunneqassaaq.
- Ersisarpunga sillimarusaartunngorlungalu. Qanorluunniit iliuuseqarsinnaasoq eqqarsartalerpunga. Ilaquttakka suneqannginniassammata kamaannaveersaarnissaa anguniartarpara.
Ukiup ataatsip ingerlanerani arnaq taanna N-imit tusindileriarluni sianeqattaarfigineqarsimasoq allaaserereernikuuarput - 8898-eriarluni. Arnaq tassunga 3.760-eriarluni sianernikuusimasoq politiit kisitsisaataasa paasitippaat.
Angerlarsimaffitsinni nakkutilliissuteqartoq aamma siusinnerusukkut paasivarput.
- Allaannginnarmi paarnaarussaallunga, arnaq oqarpoq.
Arnap oqaluttuartinneqarnerani tarnikkut naalliutitsineq sioorasaarinerillu kisimik sammineqarput. Kokaini eqqaaneqanngilaq. Sammisat immikkoortinneqarnerat ersarippoq.
Uunnerluussutit arlallit
Eqqartuussiviup ilisimannittut allat aappariissimasunik ilisarisimasallit qaaqquai.
Ilisimannittut marluk unnerluussaasup ikinngutigai, taakkuali nassuiaataat N-ip nammineq oqaluttuarisartagai aallaavigaat.
Arnap angutaa eqqartuussivimmi aamma sassartinneqarpoq pisunilu nammineq aqqusaakkani oqaluttuaralugit. Allaqatigiinnerit takusimasani oqaluttuarai.
N-ip ilaqutai kingusinnerusukkut takkutissapput.
N-ip tarnikkut naalliutitsisimasutut unnerluunneqarnermi saniatigut nakuuserniarluni sioorasaarisimasutut aamma unnerluutigineqarpoq. Immiussami "tamassi ikuallatsissavassi"-mik oqartoq tusaavarput. N tarnikkut naalliutitsisimasutut sioorasaarisimasutullu pisuunnginnerarpoq.
Eqqartuussinermi peqataasut kinaassusaat Sermitsiamit ataqqiniarlugit paasissutissat eqqartuussinermi saqqummiunneqartut ilaat allaaserinngilavut.
Pinerluttulerinermi inatsit allanngortinneqarmalli Kalaallit Nunaanni tarnikkut naalliutitsinermi suliaq siullerpaammat immikkut samminiarlugu aalajangerparput.
