Tarnip pissusaanik ilisimasallit pillugit malittarisassat ukiuni tallimani kinguaattoorfiusut
Tarnip pissusaanik ilisimasallit pillugit nalunaarummik nutaamik Inatsisartut aalajangiiffigissassaannik siunnersuummik pilersitsinissaq ukiut tallimat utaqqineqarpoq.
Namminersorlutik Oqartussat tarnip pissusaanik ilisimasallit pillugit nalunaarummik nutaamik suliaqarnerat sivisusimavoq.
Assiliisoq: Leiff Josefsen
Nalunaarummik nutaamik tarnip pissusaanik ilisimasalinnut minnerpaaffiusumik malittarisassalimmik, taaguutip illersorneqarneranik napparsimasullu pisinnaatitaaffii pillugit imalimmik, Naalakkersuisut tusarniaassummik saqqummiusseqqammerput.
Nalunaarutip 2019-imi Inatsisartut ukiakkut ataatsimiinneranni politikkikkut aalajangiinermut naapertuunnissaa siunertaasoq, Naalakkersuisut nalunaarutigaat.
Aalajangersakkat makku inatsisissatut siunnersuutip ilagai:
- Kina tarnip pissusaanik ilisimasalittut imminut taasinnaava (Taaguummik illersuineq)
- Tarnip pissusaanik ilisimasallit pisussaaffii (qajassuussilluni peqqissaarlunilu sulisussaatitaaneq aamma nalunaarsuiffinnut allattuisussaatitaaneq)
- Suliamut tunngasunik allattugaatinik paasitinneqarsinnaatitaaneq
- Nipangiussisussaatitaaneq
- Nakkutilliineq
- Naammagittaalliorsinnaaneq
- Pineqaatissiinissamut aalajangersaaneq
Tusarniaanermut killigititaq decembarip 17-ianut Naalakkersuisunik inissinneqarsimavoq.
Nalunaarummut siunnersuut tamaat uani atuarneqarsinnaavoq.
