Tasiilami immap itissusaanik nalunaarsuineq aallartippoq
Asiaq Tasiilap umiarsualiviani immap itissusaanik uuttortaalersimavoq, tamannalu siunissami angallannerup isumannaatsuunerulernissaanut iluaqutaassaaq.
Aana umiatsiaq aluminiumik sanaaq Tasiilami immap itissusaanik uuttortaaviusoq.
Assi: Asiaq
Tasiilami umiarsualiviup itissusaa uuttortarneqareerpat, Tasiilap eqqaani nunaqarfiit umiarsualiviini allani aamma uuttortaanerit aallartinneqassapput.
Ineqarnermut Attaveqaasersuinermullu Naalakkersuisoqarfik qanimut
suleqatigalugu aningaasaliisoralugulu uuttortaanerit ingerlanneqarpoq, Naalakkersuisoqarfillu
umiarsualivinnut akisussaasutut inissisimavoq, tusagassiuutinut nalunaarummi Asiaq ilisimatitsivoq.
Ilisimatitsissutaavoq uuttortaanerit
Asiap aquuteralaanik aluminium-imik sanaajusumik ingerlanneqartut, aquuteralak taanna multibeam ekkolod-eqarluni. Multibeam ekkolod nutaaliaavoq piginnaasaqaqalunilu,
itissutsimik uuttortaaginnarani immap naqqa eqqortumik 3D-mik scanner-neqarsinnaavoq.
Assit sukumiinerusut
Paasissutissat
katersorneqartut Asiaq-mi suliareqqinneqarumaarput, kingusinnerusukkullu
Geodatastyrel-sip saqqummiuttagaanut Kalaallit Nunaata Umiarsualiviinut
ilanngunneqarumaarlutik.
- Uuttortaanermi
itissutsit pissarsiariinnarnagit immap naqqata isikkua aamma takuneqartarpoq,
ilaatigullu soorlu umiarsuit, cykelit, pisiniarfimmi kaassuartakkat
assigisaallu kivinikut takuneqarsinnaallutik, tusagassiuutinut nalunaarummi Asiaq allappoq.
Ineqarnermut
Attaveqaasersuutinullu Naalakkersuisoq Hans Peter Poulsen sulineq pillugu ima oqaaseqarpoq:
- Tasiilami Tasiilallu umiarsualiviini uuttortaanerit maanna
aallartinneqarmata nuannaarutigingaarpara. Umiarsualivinni imaani angallannermi
isumannaallisaanermut tapertaanissaq Naalakkersuisunut pingaaruteqarpoq.
Tunumi umiarsualiviit arlaqartut nutaalianik uuttortarneqarnissaat sivisuumik
utaqqineqarsimavoq, taamaattumillu Asiaq suleqatigalugu umiarsualiviutitta
arlaqartut itissuaat paasissagatsigit nuannaarutigaara.
