Tasiilap eqqaani nuna sajuttoq
Tasiilap eqqaani nunap ullumi sajunnera inuit malugisinnaasimavaaat. Sumiiffimmili nuna sajutsillugu amerlanertigut annikitsumik ajoqusiisarpoq.
Nunap sajunnera innuttaaasut malugisimagaat immiussani Facebookimi saqqummiunneqartuni takuneqarsinnaavoq.
Assi: Oscar Scott Carl
Nuna Tasiilamiit 27 kilometerisut ungasitsigisumiittoq tallimanngornermi nalunaaqutaq 12.19 sajuppoq. Taanna richterip uuttuutaa naapertorlugu 4,7-mik sakkortussuseqarpoq.
Nittartakkami earthquaketrack.com-imi takuneqarsinnaavoq.
Nunap sajunnera 10 kilometerisut ititigisumi pivoq.
Nunap sajunneri richterip uuttuutaani 2,5-imiit 5,4-imut sakkortussuseqartut inuit qanittumiittut malugisinnaasarpaat, taakkuli annikitsuinnarmik ajoqusiisarput.
Tasiilami innuttaasut nunap sajunnera malugisimagaat immiussani Facebookimi saqqummertut ilaanni takuneqarsinnaavoq.
Qaqutigoortuunngitsoq
Tunumi nunap sajuttarnera qaqutigoortuunngilaq.
Tasiilami eqqaanilu sapaatip-akunnerata ingerlanerani nunap sajunneri annikitsorpassuit uuttortarneqarsimasut Kommuneqarfik Sermersooq apriilimi tusagassiuutitigut nalunaarummi allappoq. Sajunnerit 40-t angullugit uuttortarneqarsimapput.
Nunalli sajunneri taakku ullumi uuttortarneqartumit sakkukinnerupput, sakkortunerpaat marluk richterip uuttuutaani 2,3-mik aamma 2,4-mik sakkortussuseqarlutik. Amerlanersaat ima saakkukitsigaat malugineqarsinnaanatik.
