»Tatineqartorujussuit«

Tamanna tarnikkut napparsimasunut sullissisunullu nutaarsiassaanngilaq. Allarpassuarnulli eqqarsalersitsisinnaavoq. Immaqalu eqqissisimanngisitsilersinnaalluni.

Danmarkimi ilisimatusarnermik ingerlatsiviup VIVE-p nalunaarusiaani nutaami tarnikkut nappaateqartut pillugit ima allassimasoqarpoq:

- Immikkoortortat tamarmik sulisussaaleqinermik unammilligassaqartut misissuinerup takutippaa. Ingammik tarnip nappaataanut immikkoortortaqarfimmi nakorsat immikkut ilisimasallit amigaataapput. Aqutsisunut ullut tamaasa unammilligassaqartitsivoq, taakkumi sulisoqarniarlutik suliffissatut pilersaarutit ataqatigiissarniartuartarpaat.

Sulisut taarseraannerat napparsimasunut sulisunullu tatisipput, aamma sulisut ilinniarsimanngitsut annertuumik atorneqartariaqarnerannik kinguneqartartoq nalunaarusiami erseqqissarneqarpoq. Sulisut sapinngisartik tamaat sulipput, piginaasaalli killeqarlutik.

- Innuttaasut tarnikkut nappaatillit qanoq iliuuseqarfigineqartarneranni immikkut ilisimasanik amigaateqartoqarpoq. Tamatumunnga tunngatillugu ilisimasaqannginnermi sulineq toqqissisimananngitsutut misinnarsinnaasarpoq, nalunaarusiami ilaatigut peqqinnissaqarfimmi, kommunini allanilu innuttaasunik tarnikkut nappaatilinnut malunniutinillu attuumassuteqartunik sullissisunik 19-inik apersuinerit 15-it tunngavigalugit allassimavoq.

Siammartoq

Kisitsisit kingulliit naapertorlugit innuttaasut 1400-t tarnikkut nappaateqalersimasutut nalunaarsorneqarsimapput, tassa innuttaasut 1000-iugaangata 25-t missaanniipput.

Peqqinnissaq pillugu ataatsimiititaliarsuaq 2023-mi nalunaarusiamini »tarnikkut nappaateqartunut katsorsaariaatsit pisariaqartinneqarluartut pisariaqartinneqartorujussuusut« aamma allappoq.

Nalunaarusiami nutaami, Vive-mit suliarineqartumi, nakorsat atorfinitsinnissaat unammillernartuusoq »siunissamilu qanittumi pitsaanerulernissaa ilimanaateqanngitsoq“ atuarneqarsinnaavoq.

- Danmarkimi tarnikkut napparsimasunut sullissisut amigaataapput, tamannalu Kalaallit Nunaannut malunnartumik aamma sunniuteqartarpoq, nalunaarusiami allassimavoq.

- Atorfiillu ilaanni — soorlu nakorsat, peqqissaasut tarnikkullu pissusiinik ilisimasallit — tamakkiisumik ilaannakoortumilluunniit qallunaanik isumalluuteqartoqarpoq, nalunaarummi allassimavoq.

Ilisimatusartunut paasissutissat tunniunneqartut naapertorlugit tarnikkut nappaatinut immikkut ilisimasallit sivikinnerusumik, sapaatip-akunneranit qaammammut ataatsimut, atorfeqartarput. Nakorsallu inuusunnerusut qaammatini pingasuniit arfinilinnut atorfeqartarput.

Nalunaarusiaq naapertorlugu sulisut ilitsersuunneqartuartarnerat nukinnik atuiffiuvoq tamatumunngalu immikkoortortaqarfimmi aqutsisut piffissarujussuaq atortariaqartarpaat.

 - Taamaattumik sulinermut aaqqissuussamillu aqutsinissaannut piffissaat tatineqaqqavoq, nalunaarusiami nassuiarneqarpoq.

Nalunaarusiami aamma siunnersuutigineqarpoq Peqqinnissaq pillugu Ataatsimiititaliarsuup innersuussutaanut atatillugu aaqqiissutissanik pilersitsisoqarsinnaasoq. Ataatsimiititaliarsuup isumaliutissiissutaata saqqummiunneqarnerata kingorna Nuummi Sanap eqqaani tarnikkut nappaatillit napparsimmavissaannik sanaartornissamut aningaasaliisoqarsimasoq nalunaarusiami nuannersutut aamma tikkuarneqarpoq.

Pisariaqartitaqarpoq:

- Napparsimmaviup inissaatai maanna killeqarmata napparsimasut siusinaartumik iperarneqartarput naak Danmarkimiusuuppat sivisunerusumik katsorsarneqassagaluartut. Ilaannikkut pissutsit suli inissinneqanngitsut kommuunimiillu ikiorserneqassanersut suli nalunartoq iperaasoqarsinnaasarluni.