Terminalip nutaap ammarnissaanut KAIR qaaqqusivoq
Nuummi terminalip nutaap juunip 17-ani atoqqaartinneqarnera sioqqullugu soqutiginnittut tamarmik apriilip 28-ani takuniaasinnaapput.
Nuummi mittarfissualiornermi pingaarutilimmik naammassisaqaqqinneq nalliuttorsiutaassaaq.
Naak terminali apriilip 28-ani suli naammassilluinnanngikkaluartoq, ”ammaalluni nalliuttorsiornerpiaq” tassani pineqartoq, Kalaallit Airportsimit oqaatigineqarpoq.
- Naammassivinnginnitsinni tamanut ammasumik qaaqqusilluta terminalip nutaap ammarneqarnera malunnartissavarput. Ilaatigut illu tamakkerlugu angalaarfigalugu mittarfik tamaat inuit takusinnaaniassammassuk qaaqqusivugut. Terminali atorneqalereerpat taamaaliorsinnaajunnaartussaavugut, Kalaallit Airportsimi pisortaq Jens Lauridsen tusagassiuutinut nalunaarummi oqarpoq nangillunilu:
- Anguniagaq pingaarutilik taanna malunnaateqartoq pingaaruteqartorlu angugatsigu tulluusimaarutigisorujussuuarput nuannaarutigisorujussuullugulu, uagutsinnuinnaanngitsoq, kisianni Kalaallit Nunaat tamakkerlugu. Terminalip takutinnissaanut qilanaarpugut, amerlasuullu ulloq taanna takkunnissaat nalliuttorsioqataanissaallu neriuutigaarput.
Ammaanersiorluni oqalugiarnerit
Naalakkersuisut siulittaasuata Múte B. Egedep, Kommuneqarfik Sermersuumi borgmesterip Avaaraq Olsenip aamma Kalaallit Airportsimi siulersuisuni siulittaasup Kjeld Zacho Jørgensenip ammaanersiornermi oqalugiarnerinik aaqqissuussaq nalunaaqutaq 12.00 aallartissaaq, kingornalu soqutiginnittut terminali nutaaq angalaarfigisinnaavaat, nalunaaqutaq 16.00 aaqqissuussinerup naammassinissaata tungaanut.
Kaffillertoqarlunilu kaagillertoqassasoq, aammalu apeqqutissat akissuteqarfigineqarsinnaasut ilisimatitsissutaavoq.
Sanaartornermik ingerlatsivik MT Højgaard terminalimik nutaamik sanaartortuuvoq. Novembarip 28-ani timmisartoqarfissap nutaap naammassinissaa naatsorsuutigineqarpoq.
