Thulemi ilisimasassarsiorneq Arnarulunnguarlu aningaasani pappiaqqani nutaani assiliartaassapput
Sapiitsuliornerit aningaasani pappiaqqani 50, 100, 200 aamma 500 kr-ini assiliartaassapput, Thulemilu ilisimasassarsiorneq Arnarulunnguarlu toqqakkanut ilaapput. Taama Nationalbanken paasissutissiivoq.
Arnarulunnguaq Knud Rasmussenip tallimassaannik Thulimi ilisimasassarsiorneranut tusaamaneqaqisumut peqataavoq. Nationalmuseum naapertorlugu ilisimasassarsiorneq Kalaallit Nunaannit, Canadap issittortaatigut, Alaskap avannamut sineriaatigut Beringsstrædimut Siberiallu avannamut kangiani nuuani pivoq.
Assiliisoq: Nationalmuseet, Danmark
Nationalbankip tallimanngornermi aningaasani pappiaqqani suut assiliartaanissaat saqqummiuppaa.
Imaq assiliani assigiissutaassaaq. Sammisaq taanna aningaasat pappiaqqat tunuanniissasoq, Nationalbanken tusagassiuutinut nalunaarummini allappoq.
Saqqaanni sapiitsuliornerit assiliartaliunneqassapput, tassanilu Thulemi ilisimasassarsiorneq Arnarulunnguarlu nunatsinneersuussaaq.
Aningaasat sinnerini sammisat allat oqaluttualianinngaanniissapput, H. C. Andersenilu, ulloriarsiorneq Tycho Brahelu kiisalu Nunarsuup qitia Inge Lehmannilu.
- Kunngeqarfimmik ataatsimuulersitsisinnaavoq
- Aningaasat pappiaqqat kunngeqarfimmik ataatsimuulersitsisarput, akiliutitut ilisarnaatitullu.
- Sapiitsuliat inuillu nunatsinni takutitsilluartut, qangaanillu ullutsinnillu ataatsimuulersitsisut nassaarinissaat siunnerfigisimavarput, nationalbankdirektør Christian Kettel Thomsen, immikkut ilisimasalinni aningaasanut pappiaqqanut assiliartassanik toqqaasuni siulittaasoq oqarpoq.
Immikkut ilisimasallit imaq assigiissutaassasoq toqqarpaat, taannami ataatsimut kinaassutsitsinni qitiusutut, imarsiornikkut, niuernikkut aalisarnikkullu inuiaqatigiitsinnik ilusiliisutut peqatigisaanillu qasuersaartarfittut qitiuvoq.
Aningaasat pappiaqqat nutaat ilusilersorneqarnerat 2026-mi qaammatini pingasuni siullerni naammassinissaa naatsorsuutigineqartoq, Nationalbanken ilisimatitsivoq, taamanikkussamullu Nationalbankip aningaasat pappiaqqat isukkussaat tamanut saqqummiutissavai. Aningaasat nutaat 2028-mit kaaviiaartinneqalissapput astronomi.
