KL

DK

Timmisartoq ambulance Nuup mittarfianut mikkumanngitsoq

Air Greenlandip suleqataa SmuuthCare Nuup mittarfianut timmisartuussiumannginnera pissutigalugu Københavnimut napparsimmavissuarmukaassisut Kangerlussuakkoortinneqarput.

Nuup mittarfiata qularutigineqarnera pissutaalluni Københavnimut napparsimmavissuarmukaassisut Kangerlussuakkoorput. Taamaattoqaqqissanngitsoq timmisartortitseqatigiiffiit nalunaarutigaat.
Morten Okkels Tusagassiortoq
Saqqummersinneqarpoq

Napparsimmavimmiit Nuummiit Københavnimut angallanneqartoq decembarip aqqarnganni aallartinneqarmat timmisartoq Kangerlussuakkoorsimasoq Sermitsiami allaasereqqammerparput.

Naak Nuummiit toqqaannartumik Atlantikoq qulaallugun ovembarip naaneraniilli timmisartuussisoqarsinnaaleraluartoq timmisartut marluk atorlugit Kangerlussuakkooqqaarluni angallassisoqarnera immikkut maluginiagassaavoq.

Maanna nassuiaatissaqalerpoq. Air Greenlandip suleqataa SmuuthCare Nuummut mikkusunngilaq. Mittarfiup qanoq inneranik nalunaarusiat pitsaassutsimut tunngassuteqartut SmuuthCarep qularutigisimagunannguatsiarpaa.

Tamatuma kingunerisaanik angallanneqartoq Air Greenlandimit avannamut Kangerlussuarmut timmisartuunneqariarluni SmuuthCaremit kujammut Københavniliaanneqarpoq.

Timmisartortitseqatigiiffiilli siunissami taamaaliornaveersaarniarlutik isumaqatigiissuteqarput.

– SmuuthCare taamaallaat Nuup mittarfianiiit siunissami timmisartuussisarnissaa Air Greenlandip uppernarsarsinnaavaa. Decembarip aqqarnani timmisartuussinermut atatillugu oqaatigisinnaavarput taamanikkut Nuummut timmisartuussinissamut piareersimalluinnarsimanngitsut, maannali piareersimapput. Tamannalu soorunami nuannaarutigaarput, Air Greenland ilisimatitsivoq.

KANGERLUSSUAKKOORTOQARSIMANERA IMA PAASIVARPUT

Sermitsiaq timmisartunik soqutigisalinnik atuartartorpassuaqarpoq. Taakkua ilaasa paasissutissiissutaat aallaavigalugu timmisartup Kangerlussuarmut aqqusaarsimanera allaaseraarput, maannalu tamanna nassuiaatissarsillugu.

Atuartartup Air Greenlandip timmisartua King Air 250 Nuummiit Kangerlussuarmut ingerlaartoq decembarip aqqarngani takusimavaa. Peqqinnissaqarfik angallassigaangami timmisartoq taama ittoq atortaraa atuartartup ilisimavaa.

Atortorissaarutit soorlu app-eq flightradar24 atorlugu timmisartut ingerlaarfii takuneqarsinnaapput, taamaalillunilu aamma takuneqarsinnaavoq SmuuthCarep timmisartua piffissap taamaasinerani Billundimiit Kangerlussuarmut Københavniliartussanngorluni aggersarneqartoq.

Taamaattumik ambulancet timmisartui marluk imminnut attuumassuteqarsinnaagunarlutik, tamannalu Sermitsiap peqqinnissaqarfimmit uppernarsarsinnaasimavaa.

Qujanaq atuartartutsinnut timmisartunik soqutiginnittumut allanullu Sermitsiap suliaanik tapersersuisunut pissanganartunik qaqutigoortunilluunniit takusaqaraangamik siunnersuuteqartartunut.

Timmisartuussisoqarsinnaavoq

Nuummi mittarfimmut immikkut piumasaqaatit, ilaatigut timmisartortitseqatigiiffiit sorliit mittarfimmik atuisinnaanerat, toqqaannartumik timmisartuussinissamut akornutaanngitsoq Angallannermut Aqutsisoqarfiup Greenland Airportsillu naqissuserpaat.

SmuuthCare GL-normu atorlugu Kangerlussuarmut Kangerlussuarmillu timmisartuussisarpoq, tassa Air Greenlandip aqqani. Taamaasilluni SmuuthCare Air Greenlandip pisinnaaneratut Nuummut timmisartuussisinnaavoq. Periarfissarli tamanna atorumasimanngilaat.

Siunissamili taamaaliortoqassaaq. Air Greenlandip nalunaarutaa Kristian Høegip, SmuuthCaremi ingerlatsinermut pisortaasup, Sermitsiamut uppernarsarpaa.

Nuummut timmisartornissaq toqqissisimassutigaarsi?

- Taamaalluinnarpoq, Kristian Høeg oqarpoq.

Soorunami taamaappoq, Greenland Airports Sermitsiap saaffiginninneranut akissuteqaammini erseqqissaavoq.

– Timmisartoqarfik (mittarfillu) angallannermut aqutsisoqarfimmit akuerineqarnikuuvoq. Mittarfiit pillugit nalunaarusiavut malittarisassat tamaasa malillugit mittarfinnillu nakkutilliisunit akuerisaasuniit suliarineqarput, attaveqaqatigiinnermut pisortaq Mikkel Bjarnø Lund oqarpoq.

kangerlussuaq smuuthcare inuiaqatigiit air greenland ny lufthavn i nuuk samfund

ATORFIIT Se alle jobs

Powered by Labrador CMS