SILARSUAQ
Timmisartoq ilaasartaat nutaamik motoritaaqqammerluni Indiami nakkarpoq
Timmisartup aserfallatsaaliorneqarnissaa pillugu mianersoqqussutinik ajornartorsiutinilluunniit takussaasoqanngilaq, Air India nalunaarpoq.
Timmisartoq Dreamlineri sapaatip akunnerata siuliani Indiami nakkarpoq, timmisartumilu issimasut tamangajammik ajunaarput. Nakkarneranut pissutaasoq suli ilisimaneqanngilaq.
Arkivfoto: Sam Panthaky/Ritzau Scanpix
Air India-p timmisartua ilaasartaat, sapaatip akunnerani kingullermi Indiami nakkartoq, motoorimigut ajornartorsiuteqarsimanngilaq.
Tassunga tunngatillugu Air India-p siulersuisuini siulittaasoq, Natarajan Chandrasekaran, Indiami tv-station Times Now-mit apersorneqarluni oqarpoq, nutaarsiassaqartitsivik Reuters allappoq.
Timmisartup motoria saamerleq nutaajuvoq marsimi ukioq manna ikkussuunneqarsimasoq, talerperliup motooria kingullermik 2023-mi misissorneqarsimavoq, taanna oqarpoq.
Mianesoqqussutinik ersalasunik aappaluttunik soqanngilaq aamma aserfallatsaaliuinermi ajornartorsiutinik mianersoqqussuteqanngilaq, siulittaasoq Reuters naapertorlugu oqarpoq.
Timmisartoq nakkarpoq, sekuntit arlallit qaangiummata Ahmedabad-imiit Indiap avannamut kangisissuaniit qangattaqqammiinnarluni, Gatwick-imut, Londonimi, tuluit nunaanni illoqarfissuarmut ingerlaartussaagaluarluni.
Ilaasut 242-t ilaat ataaseq aniguisimavoq, timmisartorlu najugaqarfiit ilaannut nakkarpoq, nunami inuit 30-t sinnerlugit amerlassusillit ajunaarnerannik kingunilimmik. Timmisartoq illumut nunamiittumut aporpoq, sakkortuumillu qaarluni.
Aniguisoq - tuluk angut indiamik kingoqqisuusoq - issiavimmi 11A-mi issiavoq timmisartumi ajunaalernermi aniffissiap nalaani.
Indiami oqartussaasut pingasunngornermi nalunaarput, ajunaartut 200-t sinnerlugit amerlassusillit DNA-mik misissuiffigalugit kinaassusaat paasineqarsimasut.
Karsit sort boksemik taaneqartartut marluk timmisartumiittut, Boeing 787-8 Dreamlinerimeersut, tamarmik nassaarineqarput.
Karsit marluk taakku imarisai iluaqutaassapput timmisartup nakkarneranut pissutaasup paasiniarneqarnerani. Ataaseq tallimanngormat nassaarineqarpoq, aappaalu sapaammi nassaarineqarluni.
Karsip aappaa timmisartup systemianiit teknikkikkut paasissutissanik nalunaarsuisuuvoq - tassunga ilanngullugit timmisartup portussusia, sukkassusia aamma motorip kaaviiaartinneqarnera ajutoornerup tungaanut. Karsillu aappaa nalinginnaasumik cockpittimiit nipinik immiussisarluni.
Angalasut akornanniipput Indiamiut 169-it, tuluit 53-it, Portugalimiut arfineq-marluk aamma canadamiu ataaseq.
